ទីបំផុត The Witcher រដូវកាលទី២របស់​តារាសម្ដែង Henry Cavill បានបញ្ចប់ការថតហើយ (មានវីដេអូ)

បរទេស៖ ប្រិយមិត្តមួយចំនួនប្រាកដជាបានស្គាល់មកហើយនូវតារាសម្ដែងដែលមានរូបរាងសង្ហាគឺលោក Henry Cavill ដែលទទួលបានប្រជាប្រិយភាពជាច្រើនក្នុងការសម្ដែងនូវខ្សែភាពយន្តរបស់ DC​ ដោយមានតំណែងជាតួអង្គកំពូលវីរបុរស Superman នេះឯង។ មិនត្រឹមតែប៉ុណ្ណោះលោកក៏បានចូលរួមសម្ដែងនូវខ្សែភាពយន្តភាគដ៏ល្បីឈ្មោះមួយរបស់ Netflix មួយទៀតផងដែលគឺខ្សែភាពយន្ត The Witcher ដែលគឺជារឿងដែលផលិតដោយផ្អែកលើស៊េរីសៀវភៅដែលមានឈ្មោះដូចគ្នា (The Witcher) ដោយអ្នកនិពន្ធប៉ូឡូញលោក Andrzej Sapkowski ដែលត្រូវបានបង្កើតបានជាវីដេអូហ្គេមល្បីឈ្មោះថា The Witcher នេះឯង។

ខ្សែភាពយន្ត The Witcher កាលពីរដូវកាលទី១ បានចេញឱ្យប្រិយមិត្តទស្សនាកាលពីឆ្នាំ២០១៩ ត្រូវបានទទួលការគាំទ្រយ៉ាងច្រើនពីសំណាក់អ្នកគាំទ្រទូទាំងពិភពលោក។ ជាការពិតណាស់មានការសរសើរក៏កគង់តែមានការរិះគន់ផងដែលសម្រាប់ The Witcher រដូវកាលទី១នេះ ក៏ប៉ុន្តែការរិះគន់នោះគឺមានទាបបំផុតគឺផ្ទុយទៅវិញគឺខ្សែភាពយន្តភាគ The Witcher នេះទទួលបានពិន្ទុពី Rotten Tomatoes បានប្រមាណ 67% ជាមួយនឹងពិន្ទុ 8.2/10 នៅក្នុង IMDb ផងដែរ។ ក្រោយពីទទួលបានកាលគាំទ្រជាច្រើនពីសំណាក់ទស្សនិកជនខ្សែភាពយន្តដែលចំណាយលុយខ្ទង់លានដុល្លារក្នុងមួយភាគៗ នេះបានប្រកាសជាផ្លូវការនឹងបញ្ចេញរដូវកាលទី២របស់ខ្លួនផងដែរ រួមទាំងបញ្ចូលតួអង្គផ្សេងៗថ្មីបន្ថែមទៀតជាមួយនឹងការកែប្រែកំហុសកាលពីរដូវកាលទី១ផងដែរ។

យ៉ាងណាមិញ ដោយសារតែការរាតត្បាតពីជំងឺឆ្លងចង្រៃគឺ Covid-19 បានធ្វើឱ្យដំណើរកាលនៃការផលិតខ្សែភាពយន្តផ្សេងៗរបស់ក្រុមហ៊ុននានានៅលើសកលលោកមានការរអាក់រអួលជាច្រើនក្នុងនោះមានខ្សែភាពយន្តភាគ The Witcher រដូវកាលទី២នេះផងដែរ ពោលគឺសមាជិកក្រុមការងារជាច្រើននាក់របស់ The Witcher រដូវកាលទី២នេះបានធ្វើតេស្តវិជ្ជមានចំពោះ COVID-19។ មិនត្រឹមតែដោយសារតែមេរោគរាតត្បាតនេះទេដែលធ្វើឱ្យការផលិតមិនរលូនក្នុងនោះក៏ដោយសារតែលោក Henry Cavill បានរងរបួសសរសៃពួរដែលបណ្តាលឱ្យផលិតកម្មផ្អាកថតលើ ឈុតឆាករបស់លោកខណៈនៅពេលដែលផលិតកម្មបានចាប់ផ្តើមបន្ត។ ទោះជាយ៉ាងណា The Witcher បានបន្តការថតដោយគ្មាន Cavill រហូតដល់គាត់អាចត្រឡប់មកវិញបាន។

បន្ទាប់ពីការពន្យារពេលទាំងអស់នេះ The Witcher ពេលនេះមើលទៅដូចជា បានបញ្ចប់ការងារនៅរដូវកាលទី ២ របស់ខ្លួនហើយ។ អ្នកតែងខ្លួន (Makeup-Artist) Jacqueline Rathore បានបញ្ជាក់នៅលើបណ្តាញសង្គម Instagram ថាការងារភាគច្រើនបានបញ្ចប់ហើយសម្រាប់រដូវកាលទី ២នេះ ដោយការថតរំពឹងថានឹងបញ្ចប់នៅថ្ងៃទី ១ ខែមេសានេះឯង។ អ្នកគាំទ្រនឹងមានអារម្មណ៍សប្បាយចិត្តជាខ្លាំនៅពេលដែលបានឮថាផលិតកម្មត្រូវបានបញ្ចប់សម្រាប់ The Witcher រដូវកាលទី ២​ នេះខណៈពេលដែល COVID-19 នៅតែជះឥទ្ធិពលយ៉ាងខ្លាំងដល់ឧស្សាហកម្មនេះដោយផលិតកម្មជាច្រើនប្រឈមនឹងការពន្យារពេលជាច្រើននៅពេលពួកគេថតនៅក្នុងស្ថានភាពដែលមិនធ្លាប់មានពីមុនមក។ ជាមួយនឹងការថតចប់នៃភាពយន្តភាគនេះ Netflix អាចនឹងត្រៀមចេញរដូវកាលទី ២ នៅចុងឆ្នាំ២០២១ខាងមុខនេះបើយោងតាម The Witcher រដូវកាលទី១ បានបង្ហាញខ្លួនដំបូងនៅខែធ្នូឆ្នាំ ២០១៩ មានន័យថារដូវកាលទី ២ ទំនងជានឹងចាក់បញ្ចាំងរយៈពេល ២ ឆ្នាំបន្ទាប់ពីការបង្ហាញខ្លួនលើកដំបូង៕

សម្រាប់ប្រិយមិត្តថ្មីចង់ដឹងថាខ្សែភាពយន្ត The Witcher រដូវកាលទី១ មានភាពអស្ចារ្យប៉ុណ្ណា សូមទស្សនាវីដេអូ Trailer ខ្លីនៅខាងក្រោម៖