អឺរ៉ុប៖ ខ្សែប្រយុទ្ធកំពុងឡើងកូដ Diego Jota, Cristiano Ronaldo និង Joao Palhinha បានចាប់ដៃគ្នា រកម្នាក់១គ្រាប់ ជួយក្រុមជម្រើសជាតិព័រទុយកាល់យកបាន៣ពិន្ទុ ពីក្រុមម្ចាស់ផ្ទះ លុចសំបួរ កាលពីរាត្រីថ្ងៃអង្គារ ទី៣០ ម្សិលមិញនេះ ដែលជាការប្រកួតជម្រុះ World Cup ឆ្នាំ២០២២ តំបន់អឺរ៉ុប ពូល A។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សក្នុងការប្រកួតដ៏ជក់ចិត្តនេះ ក្រុមម្ចាស់ផ្ទះជាអ្នកបើកគណនីនាំមុខមុន ធ្វើបានតាមរយៈការតែតរបស់កីឡាករ Gerson Rodrigues ប៉ុន្តែ ខ្សែប្រយុទ្ធ Jota បានរកតាមស្មើឲ្យព័រទុយកាល់វិញ មុនបញ្ចប់តង់ទី១ ពោលគឺនៅនាទីទី៤៥។
លុះឈានចូលតង់ទី២ បាន៦នាទី ម្ចាស់អាវលេខ៧ Ronaldo បានពែន១ជើងស្ដាំ ក្រោយទទួលបានបាល់លើកពីមិត្តរួមក្រុម Joao Cancelo សម្រេចគ្រាប់ទី២ឲ្យក្រុមព័រទុយកាល់ ខណៈគ្រាប់ទី៣ ធ្វើបានដោយកីឡាករ Palhinha នៅនាទីទី៨០ ដោយលទ្ធផល ១ទល់នឹង៣ បានរក្សាដល់ចប់ប្រកួត។
តាមរយៈជ័យជម្នះនេះ បានជួយក្រុមព័រទុយកាល់ ឡើងមកគ្រងកំពូលតារាងពូល A ដោយ៣ប្រកួតកន្លងទៅ ឈ្នះ២ និងស្មើ១ មាន៧ពិន្ទុ ស្មើគ្នាជាមួយក្រុមលេខ២ ស៊ែប៊ី ដែលទើបយកឈ្នះ អាស៊ែបៃសង់ ២-១ កាលពីថ្ងៃច័ន្ទ ទី៣០ កន្លងទៅ៕
បើចង់ឃើញការស៊ុតបញ្ចូលទីល្អយ៉ាងណានោះ សូមទស្សនាវីដេអូខាងក្រោម៖