Microsoft ត្រូវបានគេរាយការណ៍ថា កំពុងចរចាទិញកម្មវិធីផ្ញើសារ Discord ដ៏ល្បីល្បាញ ក្នុងតម្លៃជាង10ពាន់លានដុល្លារ

បរទេស៖ យោងតាមសារព័ត៌មាន Bloomberg បានឱ្យដឹងថា ក្រុមហ៊ុន Microsoft កំពុងចរចាទិញកម្មវិធីផ្ញើសារ Discord ក្នុងតម្លៃជាង10ពាន់លានដុល្លារ។

របាយការណ៍នេះបានដកស្រង់សំដីពីមនុស្សដែលដឹងពីរឿងនេះថា Discord បានទាក់ទងជាមួយអ្នកទិញធំៗជាច្រើន ហើយក្រុមហ៊ុន Microsoft គឺជាក្រុមហ៊ុនមួយក្នុងចំណោមនោះ ហើយម្នាក់ក្នុងចំណោមប្រភពនោះបាននិយាយថា Discord ទំនងជានឹងចេញផ្សព្វផ្សាយជាសាធារណៈ (go public) ជាជាងលក់ខ្លួនឯង។

មុននេះបន្តិច VentureBeat បានរាយការណ៍ថា Discord កំពុងស្វែងរកការលក់ ហើយកំពុងធ្វើការពិភាក្សាចុងក្រោយជាមួយភាគីមួយ។

ទាំងក្រុមហ៊ុន Microsoft និងក្រុមហ៊ុន Discord មិនបានឆ្លើយតបភ្លាមៗចំពោះសំណើរដើម្បីសុំការអត្ថាធិប្បាយទេ។

ជំងឺរាតត្បាត Covid-19 បានផ្តល់អំណោយផលល្អដល់ក្រុមហ៊ុនហ្គេម ដោយសារតែមនុស្សនៅផ្ទះ ហើយងាកទៅលេងហ្គេមវីដេអូដើម្បីជាការកម្សាន្ត ក្នុងអំឡុងពេលបិទតំបន់។

កាលពីដើមខែនេះ ក្រុមហ៊ុនផលិតហ្គេមអាមេរិក Roblox ទទួលបានជោគជ័យយ៉ាងខ្លាំងពេលបង្ហាញខ្លួនលើទីផ្សារជាលើកដំបូង បន្ទាប់ពីបានចេញផ្សព្វផ្សាយជាសាធារណៈតាមរយៈការចុះបញ្ជីផ្ទាល់ (direct listing) ជាជាងការដំណើរការ IPO (initial public offering) បែបប្រពៃណី៕