Chelsea ក្លាយជាសត្រូវជាមួយ​ Spurs ក្នុងការប្រជែងយកខ្សែប្រយុទ្ធជួរមុខរបស់ Juventus ម្នាក់នេះ

អង់គ្លេស៖ យោងតាមការបង្ហើបឲ្យដឹងពី Sport Witness ក្លិបធំនៅអង់គ្លេសទាំងពីរគឺ តោខៀវ Chelsea និង ខ្នាយមាន់មាស Tottenham Hotspur នឹងចូលប្រជែងគ្នាទិញយកខ្សែប្រយុទ្ធ Paulo Dybala នៃក្លិបសេះបង្កង់ Juventus ក្រោយក្លិបយក្សនៅអ៊ីតាលីមួយនេះបើកភ្លើងខៀវឲ្យគេចាកចេញ។

Dybala នៅសល់កុងត្រាជាមួយក្លិបម្ចាស់ពាន Serie A រដូវកាលមុននេះជិតមួយឆ្នាំទៀតប៉ុណ្ណោះ ហើយទាំង Chelsea និង Spurs នឹងបោះលុយប្រមាណ ៤៨លានផោន(ស្មើនឹងប្រមាណ ៦៦.៣លានដុល្លារ) ក្នុងការស្នើទិញយក Dybala ផងដែរ។

តាំងពី Juventus ភ្លាត់ចាញ់ Porto និងធ្លាក់ចេញពីពាន Champions League មកគឺ ក្លិបគ្រោងនឹងរុះរើកីឡាករក្នុងក្រុមដោយអាចនឹងលក់កីឡាករចេញខ្លះនិងយកប្រាក់នោះទិញកីឡាករថ្មីព្រោះក្លិបកំពុងប្រឈមនឹងវិបត្តិហិរញ្ញវត្ថុស្រាប់។

ក្នុងនោះដែរ Paulo Dybala ត្រូវបានលោកគ្រូ Andrea Pirlo មិនសូវដាក់ឲ្យចូលលេងញឹកញាប់ឡើយដោយភាគច្រើនដាក់តែ Cristiano Ronaldo, Federico Chiesa, Alvaro Morata និង Dejan Kulusevski នៅតំបន់ប្រយុទ្ធប៉ុណ្ណោះ ហើយកាលពីខែមករាមក ខ្សែប្រយុទ្ធម្នាក់បាត់មុខពីទីលានព្រោះរងរបួស។

Dybala រកបានតែ៣គ្រាប់និងបញ្ជូនបាល់ឲ្យមិត្តរួមក្រុមតែ២គ្រាប់ប៉ុណ្ណោះក្នុងការបង្ហាញខ្លួនសរុប១៦ប្រកួតនៅរដូវកាលនេះ ខណៈដែលកាលពីឆ្នាំ២០១៩ គេធ្លាប់ផ្ទុះពាក្យចចាមអារ៉ាមថានឹងផ្ទេរទៅក្លិប Spurs ផងដែរ។

កន្លងមក Juventus បានបង្ហើបថាមានការចរចាលើការបន្តកុងត្រាថ្មីដល់កីឡាករសញ្ជាតិអាហ្សង់ទីនរូបនេះដែរប៉ុន្តែសាមីខ្លួនមិនពេញចិត្តនឹងកុងត្រានោះឡើយដោយគិតថាគេគួរតែទទួលបានប្រាក់ឈ្នួលខ្ពស់ជាងនោះទើប Juventus គ្មានជម្រើសផ្សេងក្រៅពីដោះលែងឲ្យ​​ Dybala ចាកចេញ៕

ប្រភព៖ dailymail