អាចថែមលុយឲ្យពីលើទៀត! Chelsea គ្រោងនឹងយកតារាឆ្នើមរបស់ខ្លួនម្នាក់នេះទៅប្ដូរយក Haaland

អង់គ្លេស៖ ក្លិបតោខៀវ Chelsea គ្រោងនឹងយកខ្សែប្រយុទ្ធ Timo Werner ជាផ្នែកមួយនៃការដាក់សំណើទិញយកខ្សែប្រយុទ្ធ Erling Haaland ដោយអាចនឹងថែមប្រាក់មួយចំនួនពីលើនោះទៀត។

Haaland ទាក់ភ្នែក Chelsea តាំងពីឆ្នាំមុនមកម៉្លេះខណៈដែល បិសាចក្រហម Manchester United ក៏កំពុងព្យាយាមតាមបញ្ចុះបញ្ចូលគេខ្លាំងណាស់ដែរទើប Chelsea បានបង្កើតសំណើដ៏ទាក់ចិត្តនេះដល់ Borussia Dortmund ។

យោងតាម Football Insider បានបង្ហើបឲ្យដឹងថាបើ Dortmund ព្រមលក់ Haaland មកឲ្យ Chelsea នោះក្លិបរីករាយនឹងឲ្យ Timo Werner ទៅវិញខណៈដែល តម្លៃខ្លួនរបស់ Haaland គឺដល់ទៅខ្ទង់ ១២០លានផោន(ស្មើនឹងប្រមាណ១៦៥.៨លានដុល្លារឯណោះ)។

Werner ផ្ទេរពីក្លិបគោជល់ RB Leipzig មកកាន់ទឹកដី Stamford Bridge កាលពីរដូវក្ដៅមុនក្នុងតម្លៃខ្លួន៤៥លានផោន(ស្មើនឹងប្រមាណ៦២.១លានដុល្លារ) ប៉ុន្តែចាប់តាំងពីខែវិច្ឆិកាមក ខ្សែប្រយុទ្ធសញ្ជាតិអាល្លឺម៉ង់រូបនេះស៊ុតបញ្ចូលទីបានតែ១គ្រាប់គត់និងលេងមិនបានល្អដូចការរំពឹងទុកឡើយ។

Erling Haaland ឯណោះវិញក្លាយជាកីឡាករឆ្នើមដែលទទួលបានការសរសើរមិនដាច់ពីមាត់ពីបណ្ដាអ្នកគាំទ្របាល់ទាត់និងអ្នកវិភាគទាំងអស់ស្របពេលក្លិបធំៗនៅអឺរ៉ុបដូចជា Real Madrid, Barcelona, Manchester United, Manchester City សុទ្ធតែចង់បានគេ៕

ប្រភព៖ thesun