បរទេស៖ ថ្មីៗនេះ ប្រទេសជាច្រើននៅអ៊ឺរ៉ុបបានរកឃើញថាមានមនុស្សមួយចំនួនត្រូវបានរងប្រតិកម្មធ្ងន់ធ្ងរ បន្ទាប់ពីបានទទួលនូវការចាក់វ៉ាក់សាំងការពារជំងឺកូវីត១៩របស់ក្រុមហ៊ុនអង់គ្លេសមួយឈ្មោះ AstraZeneca ដោយមានអ្នកខ្លះត្រូវមានគ្រោះថ្នាក់ដល់អាយុជីវិតថែមទៀតផង។ នេះបើតាមការចុះផ្សាយរបស់សារព័ត៌មាន Channel News Asia របស់សិង្ហបុរី កាលពីយប់ថ្ងៃទី ១៦ ខែមីនា ឆ្នាំ ២០២១ ម្សិលមិញនេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សជាពិសេសនោះ កាលពីម្សិលមិញប្រភពព័ត៌មានដដែលបានឲ្យដឹងថា នៅប្រទេសស៊ុយអែតឯណោះ បានរករកឃើញមនុស្ស ១០ នាក់មានប្រតិកម្មធ្ងន់ធ្ងរ ក្រោយពីបានចាក់វ៉ាក់សាំងរួច។ បន្ទាប់មក ភ្នាក់ងារផ្នែកផលិតឱសថនៅប្រទេសនេះ បានសម្រេចចិត្តនឹងបញ្ឈប់នូវរាល់ការចាក់នូវវ៉ាក់សាំង AstraZeneca ទាំងអស់ទៅលើប្រជាជនរបស់ខ្លួន បើទោះបីជាមានវ៉ាក់សាំងជាច្រើននៅមិនទាន់ចាក់ក៏ដោយ។
គួរបញ្ជាក់ថា ប្រទេសស៊ុយអែតជាប្រទេសចុងក្រោយគេ នៅក្នុងការប្រកាសបញ្ឈប់ការប្រើប្រាស់នូវវ៉ាក់សាំង AstraZeneca បើគិតមកទល់ថ្ងៃនេះ ក៏ប៉ុន្តែយើងមិនអាចដឹងមុនថាមានប្រទេសណាខ្លះ នឹងបន្តយុទ្ធនាការនេះឡើយ។
គួររំលឹកថា កាលដើមឡើយមានតែប្រទេសប្រមាណ ២ ៣ ប្រទេសប៉ុណ្ណោះ រួមមាន អីតាលី ហូឡង់ អៀឡង់ជាដើម បានប្រកាសបញ្ឈប់ការប្រើប្រាស់នូវវ៉ាក់សាំងការពារជំងឹកូវីត១៩ ប្រភេទនេះ ក្រោយពីអីតាលីបានរកឃើញថា មានបុរសជាគ្រូបង្រៀនម្នាក់បានទទួលមរណភាពក្រោយទទួលវ៉ាក់សាំង និងមានមនុស្សជាច្រើននាក់ទៀតមានប្រតិកម្មធ្ងន់ធ្ងរផងដែរ។ ចំណែកហូឡង់វិញ មិនមានករណីប្រតិកម្មណាមួយបង្កឡើងលើប្រជាជនរបស់ខ្លួនឡើយ ក៏ប៉ុន្តែដើម្បីការពារអាយុជីវិតរបស់ប្រជាជាតិខ្លួន រដ្ឋាភិបាលបានប្រកាសបញ្ឈប់នូវការប្រើប្រាស់វ៉ាក់សាំង AstraZeneca និងពន្យារពេលនៃការទទួលវ៉ាក់សាំង ដែលបានកម្មង់ទិញរួចហើយនោះទៀតផង។
តែនិយាយពីប្រទេសក្រៅទ្វីបអ៊ឺរ៉ុបវិញ ប្រទេសថៃជាប្រទេសដំបូងគេដែលប្រកាសបញ្ឈប់ការប្រើប្រាស់នូវវ៉ាក់សាំង AstraZeneca នេះ កាលបីថ្ងៃសុក្រសប្ដាហ៍។
មកទល់ពេលនេះ បើទោះបីជាមានការបញ្ឈប់ការប្រើប្រាស់ AstraZeneca ក្ដី ក៏ប្រទេសទាំងនោះ មិនបានបញ្ឈប់នូវយុទ្ធនាការនៃការចាក់វ៉ាក់សាំងទៅលើប្រជាជនរបស់ខ្លួននោះឡើយ ព្រោះពួកគេមិនបានប្រើប្រាស់វ៉ាក់សាំងតែមួយប្រភេទនោះទេ៕