អង់គ្លេស៖ ក្រុមកាន់កាប់កំពូលតារាង Manchester City របស់លោកគ្រូបង្វឹក Pep Guardiola មានភាគរយខ្ពស់អាចឆ្លងផុតការប្រកួតក្របខណ្ឌ Champions League វគ្គ១៦ក្រុមចុងក្រោយនេះនិងអាចបន្តដំណើរទៅវគ្គ៨ក្រុមបើសិនក្លិបបន្តយកឈ្នះ Borussia Monchengladbach នៅជើងទី២ខណៈដែលក្រុមមួយនេះនៅសល់ឱកាសស្រវាពានរង្វាន់បីទៀតក្នុងដៃ គឺ Premier League,FA Cup និងCarabao Cup ជាដើម។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
អ្នកវិភាគបាល់ទាត់ដូចជា Michael Owen និង Rio Ferdinand ធ្លាប់និយាយដែរថា Man City ពិតជាអាចមានលទ្ធភាពស្រវាយកពានទាំង៤នៅរដូវកាលនេះ ស្របពេលខ្សែបម្រើ Oleksandr Zinchenko ផ្ទាល់ក៏គិតថាក្រុមរបស់ពួកគេពិតជាអាចលើកពានទាំង៤បានមែនព្រោះកន្លងមក Bayern Munich និង Barcelona សុទ្ធតែអាចសម្រេចសមិទ្ធផលដ៏អស្ចារ្យមួយនោះ ប៉ុន្តែលោកគ្រូបង្វឹក Pep Guardiola បែរជាគ្រវីក្បាល មិនយល់ស្របនឹងសម្ដីរបស់កូនក្រុមគាត់ឡើយ។
លោកគ្រូបានថ្លែងថា៖
ខ្ញុំចាស់ជាង Zinchenko ដូច្នេះហើយខ្ញុំមានបទពិសោធន៍ច្រើនជាងគេ ហើយខ្ញុំមិនយល់ស្របនឹងសម្ដីរបស់គេទេ។ Zinchenko គ្រាន់តែបារម្ភថាក្រុមអាចនឹងធ្វើមិនសូវបានល្អនាការប្រកួតថ្ងៃស្អែកទើបនិយាយបែបនេះ។ ក្លិបដែលអាចឈ្នះពានទាំង៤នេះមិនធ្លាប់មានទេក្នុងប្រវត្តិសាស្ត្របាល់ទាត់នៅអង់គ្លេស ហើយខ្ញុំគិតថាវាមិនកើតឡើងលើក្រុមពួកយើងឡើយ ពួកយើងគ្រាន់តែព្យាយាមគិតអ្វីឲ្យល្អៗ ដើម្បីត្រៀមខ្លួនប្រកួតជាបន្តបន្ទាប់ប៉ុណ្ណោះ។
គួររម្លឹកផងដែរថាក្រុមមេឃខៀវ Manchester City នឹងត្រូវធ្វើដំណើរទៅទឹកដី ហុងគ្រី សាជាថ្មីដើម្បីប្រកួតជើងទី២វគ្គ១៦ក្រុម ពាន Champions League ទល់នឹង Borussia Monchengladbach នៅថ្ងៃទី១៧ខែមីនា វេលាម៉ោង៣រំលងអាធ្រាត្រ(ម៉ោងនៅកម្ពុជា)ខណៈដែលក្លិបបានមកដល់វគ្គផ្ដាច់ព្រ័ត្រពាន Carabao Cup ព្រមទាំងអាចមានសិទ្ធិឡើងទៅកាន់ប្រកួតវគ្គពាក់កណ្ដាលផ្ដាច់ព្រ័ត្រពាន FA Cup ដោយត្រូវធ្វើការប្រកួតជាមួយក្លិបស្ករគ្រាប់ Everton នៅថ្ងៃអាទិត្យទី២១មីនា វេលាម៉ោង ០០:៣០នាទី៕
ប្រភព៖ goal
Bong I.T