មិនត្រឹមតែរកបាន២គ្រាប់ទេ យប់មិញ Messi ក៏បំបែកកំណត់ត្រាពិសេសមួយទល់នឹង Huesca (មានវីដេអូ)

អេស្ប៉ាញ៖ កាលពីថ្ងៃច័ន្ទឈានចូលថ្ងៃអង្គារទី១៦កន្លងទៅនេះ ក្លិបអ្នកមានបុណ្យ Barcelona បានបើកទ្វារកីឡដ្ឋាន Camp Nou ស្វាគមន៍ក្រុមភ្ញៀវ Huesca ដែលជាការប្រកួតក្នុងក្របខណ្ឌ La Liga ។

ចប់៩០នាទីពេញ Barcelona បានបំបាក់ Huesca ៤ ទល់នឹង ១ ដែល២គ្រាប់របស់ក្រុម Barca រកបានដោយ ខ្សែប្រយុទ្ធឆ្នើម Lionel Messi នៅនាទីទី ១៣ និងនាទីទី៩០ តាមពីក្រោយដោយ Antoine Griezmann នៅនាទីទី៣៥ បិទគូថដោយ ខ្សែការពារ Oscar Mingueza ហក់តែតនៅនាទីទី៥៣ ខណៈដែល១គ្រាប់របស់ក្រុមភ្ញៀវ Huseca ស៊ុតដោយ Rafa Mir នៅនាទីទី ៤៥+៤ ដែលជាបាល់ប៉េណាល់ទី។

យ៉ាងណាមិញ Messi ដែលជាប្រធានក្រុម មិនត្រឹមតែរកបាន២គ្រាប់ម្នាក់ឯងទេ ក្នុងការប្រកួតនេះ គេក៏បានបំបែកកំណត់ត្រាពិសេសមួយរបស់ គឺក្លាយជាកីឡាករដែលបង្ហាញខ្លួនឲ្យក្រុម Barcelona បានច្រើនជាងគេដោយស្មើនឹងការបង្ហាញខ្លួនរបស់ អតីតខ្សែបម្រើ Xavi Hernandez គឺ ៧៦៧ដងហើយ។

ម្យ៉ាងទៀត Lionel Messi ក៏បានក្លាយជាកីឡាករតែម្នាក់គត់ដែលរកបាន២០គ្រាប់ក្នុងការប្រកួត១៣រដូវកាលជាប់ៗគ្នាផងដែរ។

សរុបមក Messi បានស៊ុតបញ្ចូលទីចំនួន៦៦០គ្រាប់ឲ្យ Barcelona ដោយធ្វើឲ្យគេបំបែកកំណត់ត្រារបស់លោក Cesar Rodriguez ដែលរកបាន៤២៨ឲ្យក្លិបដោយកន្លងមកកំពូលខ្សែប្រយុទ្ធសញ្ជាតិអាហ្សង់ទីនរូបនេះលើកពានបាន៣៤ពានហើយក្នុងនាមជាកីឡាករ Barcelona។

ដោយឡែក ជ័យជម្នះទល់នឹង Huesca នេះធ្វើឲ្យ Barcelona ឡើងមកឈរនៅលេខរៀងទី២ក្នុងតារាង La Liga ដោយមាន៥៩ពិន្ទុក្នុងដៃ ចាញ់ក្រុមកំពូលតារាង Atletico Madrid តែ៤ពិន្ទុប៉ុណ្ណោះ៕

សូមទស្សនាវីដេអូនៃការប្រកួតខាងក្រោម៖

ប្រភព៖ goal