អ៊ីតាលី៖ កាលពីយប់ថ្ងៃអាទិត្យឈានចូលថ្ងៃច័ន្ទកន្លងទៅនេះ ក្លិបសេះបង្កង់ Juventus បានធ្វើដំណើរទៅកីឡដ្ឋាន Sardegna Arena ដើម្បីប្រកួតជាមួយក្រុមម្ចាស់ផ្ទះ Calgliari ដែលក្នុងនោះខ្សែប្រយុទ្ធ Cristiano Ronaldo ស៊ុត៣គ្រាប់យក Hat-Trick នៅនាទីទី ១០ ,២៥ ដែលជាបាល់ប៉េណាល់ទីព្រមទាំងបិទឆាកនៅនាទីទី ៣២ជួយឲ្យ Juventus យកឈ្នះការប្រកួត ៣ ទល់នឹង ១។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ក្រោយការប្រកួតចប់សព្វគ្រប់ វីរបុរសសញ្ជាតិប្រេស៊ីល Pele បានផ្ញើសារ មួយដល់ Ronaldo ដើម្បីអបអរសាទរដែលកំពូលកីឡាកររូបនេះបំបែកកំណត់ត្រាក្លាយជាកីឡាករដែលស៊ុតបញ្ចូលទីបានច្រើនគ្រាប់បំផុតក្នុងប្រវត្តិសាស្ត្របាល់ទាត់ដោយយកឈ្នះកំណត់ត្រាចាស់របស់លោក។
Pele ធ្លាប់បានអះអាងថាលោករកបានជាង ១០០០គ្រាប់ក្នុងអាជីពជាកីឡាករបាល់ទាត់ប៉ុន្តែអ្វីដែលបានកត់ត្រា
គឺវីរបុរសប្រេស៊ីលរូបនេះរកបានខ្ទង់ ៧៥៧គ្រាប់ប៉ុណ្ណោះដែលគិតជាគ្រាប់បាល់ក្នុងការប្រកួតផ្លូវការ ដោយ Cristiano Ronaldo ធ្លាប់បំបែកកំណត់ត្រារកបាន ៧៥៨ គ្រាប់កាលពីពេលថ្មីៗទៅនេះ។
កាលណោះ Ronaldo មិនទាន់អបអរសមិទ្ធផលនេះនោះឡើយដោយគេរង់ចាំស៊ុតថែម១៣គ្រាប់ទៀតដើម្បីវ៉ាវីរបុរស Pele ព្រោះលោកធ្លាប់បង្ហើបថាលោក ធ្លាប់ស៊ុតបញ្ចូលទីក្នុងការប្រកួតមិនផ្លូវការចំនួន១០គ្រាប់ថែមពីលើ៧៥៧គ្រាប់នោះទៀត។
ពេលនេះ Ronaldo រកបានដល់ទៅ ៧៧០គ្រាប់ក្នុងអាជីពជាកីឡាករបាល់ទាត់ ដែលវ៉ាដាច់ Pele ដល់ទៅ៣គ្រាប់ផងដែរ។
ទាក់ទងនឹងការបំបែកកំណត់ត្រានេះ វីរបុរស Pele បានបង្ហោះសារអបអរមួយក្នុងបណ្ដាញសង្គម Instagram ថា៖
Cristiano ជីវិតគឺជាការប្រកួតប្រជែង មនុស្សម្នាក់ៗសុទ្ធតែសម្រេចសមិទ្ធផលរៀងខ្លួន ហើយសមិទ្ធផលដែលអ្នកបានធ្វើគឺពិតជាស្រស់ស្អាតណាស់។ ខ្ញុំពិតជាកោតសរសើរអ្នកណាស់ ខ្ញុំចូលចិត្តមើលអ្នកចូលប្រកួតហើយគ្រប់គ្នាសុទ្ធតែដឹងរឿងនេះ។ សូមអបអរសាទរដែលបំបែកកំណត់ត្រារបស់ខ្ញុំក្នុងការប្រកួតផ្លូវការ។ អ្វីដែលខ្ញុំសោកស្ដាយនោះគឺមិនអាចឱបអ្នកបាន។ ប៉ុន្តែខ្ញុំសូមផ្ញើរូបថតនិងសារនេះដល់អ្នក ដើម្បីសម្ដែងនូវក្ដីស្រឡាញ់និងមិត្តភាពដែលខ្ញុំមានឲ្យអ្នកជាច្រើនឆ្នាំ។
ប្រភព៖ mirror
Bong I.T