Man UTD សម្លឹងចង់បាន ជើងស៊ុតកំពុងឡើងកូដ២រូប មកជំនួស Martial

អង់គ្លេស៖ យោងតាមសេចក្ដីរាយការណ៍ ខ្សែប្រយុទ្ធ Erling Haaland និង Harry Kane បានក្លាយជាគោលដៅធំរបស់ក្លិបបិសាចក្រហម Manchester United ដើម្បីយកមកជំនួស ខ្សែប្រយុទ្ធ Anthony Martial នៅរដូវក្ដៅខាងមុខ។

Martial កំពុងប្រឈមនឹងការធ្លាក់ទម្រង់លេងនៅរដូវកាលនេះ ដោយរកបានតែ៧គ្រប់គត់ ខណៈដែលលោកគ្រូបង្វឹក Ole Gunnar Solskjaer មិនសូវដាក់គេឲ្យចូលលេងទៀងទាត់ដូចលើកមុនឡើយដែលមានន័យថាតំណែងរបស់គេកំពុងររង្គោះរង្គើហើយបើសិនគេនៅតែបន្តខ្សត់គ្រាប់បាល់បែបនេះ ពិតណាស់ថា Martial នឹងត្រូវអង្គុយកៅអីបម្រុង ឫ​ ត្រូវក្លិបលក់ចោលមិនខាន។

ស្រាប់តែពេលនេះ សារព័ត៌មាន Mirror បានបង្ហើបថា Man UTD កំពុងរៀបចំដាក់សំណើទៅកាន់តារាឆ្នើមវ័យក្មេងរបស់ Borussia Dortmund គឺ Erling Haaland និង  Harry Kane នៃក្លិបខ្នាយមាន់មាស Tottenham Hotspur ដើម្បីយកម្នាក់ក្នុងចំណោមពួកគេមកជំនួស Martial ។

Haaland មានតម្លៃខ្លួនខ្ទង់ ១៥០លានផោន(ស្មើនឹងប្រមាណ ២០៨.៥លានដុល្លារ) ដែលថ្មីៗនេះគេ ទើបតែក្លាយជាកីឡាករដែលរកបាន២០គ្រាប់លឿនជាងគេនៅក្នុងប្រវត្តិសាស្ត្រ UCL ផងដែរខណៈដែលកំណត់ត្រានោះគឺ Harry Kane ក៏ធ្លាប់បំបែកបានដែរ។

ដូច្នេះ Manchester United ពិតជាចង់បានពួកគេទាំងពីរមកកាន់ទឹកដី Old Trafford ដើម្បីពង្រឹងតំបន់ប្រយុទ្ធឲ្យកាន់តែមុតស្រួចស្របពេលខ្សែប្រយុទ្ធ Edinson Cavani កំពុងបង្ហាញបំណងចង់ចាកចេញពីក្លិប៕

ប្រភព៖ thesun