មានអនាគតណាស់! អាយុត្រឹម១៦ឆ្នាំទេ តែទាំង Liverpool និង Real Madrid សុទ្ធតែកំពុងចោមរោមចង់បាន

អង់គ្លេស៖ ក្លិបហង្សក្រហម Liverpool ត្រូវបានគេរាយការណ៍ថាកំពុងសម្លឹងចង់បានកីឡាករវ័យ១៦ឆ្នាំម្នាក់ឈ្មោះ Angelo Gabriel ដែលបច្ចុប្បន្នកំពុងលេងឲ្យក្លិប Santos នៅប្រទេសប្រេស៊ីល។

ប៉ុន្តែបញ្ហាគឺ ក្លិបអធិរាជស Real Madrid នៅទឹកដីអេស្ប៉ាញឯណោះវិញក៏កំពុងចង់បាន Gabriel ដែរ នេះបើយោងតាមការរាយការណ៍ពី Sport Witness ។

ខ្សែប្រយុទ្ធសញ្ជាតិប្រេស៊ីលរូបនេះត្រូវបានក្លិប Santos អនុញ្ញាតឲ្យឡើងមកលេងនៅក្រុមយុវជនក្រោម២០ឆ្នាំកាលពីខែកក្កដាឆ្នាំ២០២០កន្លងទៅ ដោយសារតែគេបានបង្ហាញទម្រង់លេងដ៏លេចធ្លោ។

Angelo Gabriel ក៏បានជាប់ជម្រើស១១នាក់ដំបូងឲ្យក្លិបកាលពីខែតុលាកន្លងទៅនេះដែរដោយកាលណោះគេមានអាយុត្រឹមតែ១៥ឆ្នាំប៉ុណ្ណោះ ដោយបានបំបែកកំណត់ត្រារបស់វីរបុរស Pele ក្លាយជាកីឡាករវ័យក្មេងទី២ក្នុងប្រវត្តិសាស្ត្រក្លិបដែលបានចូលលេង។

សម្រាប់កុងត្រារបស់គេជាមួយក្លិប Santos វិញគឺមានសុពុលភាពដល់ឆ្នាំ២០២៣ឯណោះស្របពេលតម្លៃផ្ដាច់កុងត្រារបស់មានខ្ទង់ ៥២លានផោន(ស្មើនឹងប្រមាណ៦០លានដុល្លារ)ឯណោះ។ 

ប៉ុន្តែគេគិតថា Angelo អាចនឹងមានភាគរយទៅចូលរួមជាមួយ Real Madrid ច្រើនជាង Liverpool ព្រោះមិត្តរបស់គេគឺ Rodrygo គឺស្នាក់នៅទឹកដី Santiago Bernebeu ស្រាប់ដូច្នេះភាគីរបស់លោកគ្រូបង្វឹក Jurgen Klopp អាចនឹងត្រូវខកចិត្ត៕

ប្រភព៖ mirror