ចៃដន្យមែន! បុរសម្នាក់បង្កាត់ពូជពស់ ចេញក្រឡាដូចរូប Emoji ញញឹម ឥឡូវកំពុងដាក់លក់តម្លៃរាប់ពាន់ដុល្លារ (មានវីដេអូ)

សហរដ្ឋអាមេរិក៖ បុរសអាមេរិកម្នាក់ឈ្មោះ Justin Kobylka ដែលបានបង្កាត់ពូជពស់អស់រយៈពេលជាង២០ឆ្នាំមកនេះ មិនដែលព្យាយាមបង្កាត់ពូជឲ្យឡើងក្រឡាដូច Emoji ញញឹមដូច្នេះទេ ប៉ុន្ដែពេលនេះវាបានកើតឡើងដោយចៃដន្យ និងកំពុងដាក់លក់ក្នុងម្លៃ ៦ពាន់ដុល្លារអាមេរិក។

ដំបូងឡើយ លោក Kobylka បានព្យាយាមបង្កាត់ដោយការលាយពណ៌មាស-លឿង និងស បញ្ជូលគ្នា ប៉ុន្ដែនៅទីបំផុតកូនពស់ថ្លាន់ដែលញាស់ចេញពីពងមួយ បែ​រជាមានក្រឡាស្រដៀងទៅនឹង Emoji ញញឹមនៅលើខ្នងរបស់វា។ អ្នកបង្កាត់ពូជរូបនេះបាននិយាយថា វាបានកើតឡើងបន្ទាប់ពីលោកព្យាយាមបង្កាត់លាយពណ៌ក្នុងរយៈពេល ៨ឆ្នាំចុងក្រោយ ហើយវាជាពស់ដ៏កម្រដែលមានរូប Emoji ចំនួន៣ ស្ថិតក្នុងចំណោមពស់ចំនួន ២០ក្បាលផ្សេងទៀត។ 

គួរឲ្យដឹងថា រូប Emoji ដែលមានលើខ្លួនពស់ថ្លាន់បែបនេះ បណ្ដាលមកពីការផ្លាស់ប្ដូរហ្សែន ដោយសារការបង្កាត់ពូជជ្រើសរើស ហើយការផ្លាស់ប្ដូរហ្សែនអាចកើតឡើងបានដោយធម្មជាតិ។ តែទោះជាយ៉ាងណា គេកម្រឃើញមាននៅលើពស់ដែលរស់ក្នុងព្រៃណាស់។

ពស់ថ្លាន់ប្រភេទនេះហៅថា Ball python ដែលមានដើមកំណើតនៅអាហ្រ្វិកខាងលិច និងអាហ្រ្វិកកណ្ដាល ហើយពួកវាស្ថិតក្នុងចំណោមប្រភេទពស់ចិញ្ចឹម ដ៏មានប្រជាប្រិយបំផុតផងដែរ៕

សូមទស្សនារូបភាព និងវីដេអូខាងក្រោម៖