អាយុថ្លៃមែន! ជាប់ក្នុងព្រៃជ្រៅជាងមួយខែ តែពីឡុតម្នាក់​នៅមានជីវិត ដោយសារហូបរបស់នេះ

ប្រេស៊ីល៖ រឿងស្ទើរមិនគួរឱ្យជឿមួយ បានកើតឡើងទៅលើអ្នកបើកយន្តហោះម្នាក់ ដែលជាប់នៅក្នុងព្រៃអាម៉ាហ្សូនជាងមួយខែ ប៉ុន្ដែសំណាងល្អនៅរស់រានមានជីវិត ដោយការបរិភោគ នំបុ័ង​ ទឹកភ្លៀង ស៊ុតបក្សី​ និងផ្លែឈើព្រៃ។

លោក Antonio Sena អាយុ ៣៦ ឆ្នាំបានបាត់ខ្លួនកាលពីថ្ងៃទី ២៨ ខែមករា បន្ទាប់ពីយន្ដហោះរបស់លោក ដែលហោះហើរចេញពីទីក្រុង Alenquer រដ្ឋ Para នៅភាគខាងជើងនៃទន្លេ Amazon ប្រទេសប្រេស៊ីល បានធ្លាក់នៅព្រៃអាម៉ាហ្សូន ដោយសារម៉ាស៊ីនមិនដំណើរការ។ ប៉ុន្ដែជាសំណាង​ លោក Antonio មិនទទួលរងរបួសធ្ងន់នោះទេ ហើយក៏បានប្រញាប់ចាប់យកស្បៀងអាហារ ព្រមទាំងឧបករណ៍ផ្សេងៗទៀតចេញមកខាងក្រៅ មុននឹងយន្ដហោះឆាបឆេះឡើង។ 

យោងតាមស្ថានីយ៍វិទ្យុរបស់ប្រេស៊ីល បានរាយការណ៍ថា លោកត្រូវបានគេជួយសង្គ្រោះ ខណៈពេលលោកដើរស្វែងរកជំនួយ ក៏ជួបប្រទះនឹងអ្នករើសគ្រាប់ផ្លែឈើក្នុងព្រៃ ទើបពួកគេបញ្ចូនដំណឹងទៅក្រុមជួយសង្រ្គោះតែម្តង។

គួរជម្រាបដែរថា លោក Antonio Sena​ គឺមិនបានទទួលរងរបួសធ្ងន់ធ្ងរអ្វីនោះទេ គ្រាន់តែមានសភាពស្គមស្គាំង និងអស់កម្លាំងប៉ុណ្ណោះ ហើយបច្ចុប្បន្ននេះ លោកត្រូវបានគេបញ្ចូនទៅមន្ទីរពេទ្យ ដើម្បីទទួលការព្យាបាល៕