អ្នកស្រុកភ្ញាក់ផ្អើលថា ឃើញឆ្មាមួយក្បាលជាប់ក្នុងម៉ាស៊ីនចែកម៉ាស់ លុះអ្នកបច្ចេកទេសបកស្រាយ ទើបនាំគ្នាហួសចិត្ដ

សិង្ហបុរី៖ នាពេលថ្មីៗនេះ អង្គការ Temasek Foundation បានទទួលរបាយការណ៍ថាមានសត្វឆ្មាមួយក្បាល បានជាប់នៅក្នុងម៉ាស៊ីនចែកម៉ាស់ស្វ័យប្រវត្ដិ ក្នុងប្រទេសសិង្ហបុរី។

យោងតាមនាយកប្រតិបត្ដិក្រុមហ៊ុន Temasek លោក Ho Ching បាននិយាយថា អ្នកស្រុកព្រួយបារម្ភជាខ្លាំងហើយបានរាយការណ៍អំពីករណីនេះកាលពីថ្ងៃសៅរ៍ ទី៦ ខែមីនា ឆ្នាំ២០២១ ថាបានឃើញសត្វឆ្មាមួយក្បាលជាប់នៅក្នុងម៉ាស៊ីនចែកម៉ាស់ស្វ័យប្រវត្ដិ ហើយធ្វើឲ្យបុគ្គលិកនៅទីនោះ មានការភិតភ័យ។

តែទោះជាយ៉ាងណា ក្រុមបុគ្គលិកក៏បានព្យាយាមត្រួតពិនិត្យលើបញ្ហានេះភ្លាមៗដែរ និងបានថតរូបម៉ាស៊ីនដែលមើលទៅដូចជាជាប់កន្ទុយឆ្មានេះ ដោយបន្ថែមថាវាមិនមានខ្លួន ក្បាល និងក្លិនឡើយ រួចបានផ្ញើទៅថ្នាក់លើឲ្យជួយត្រួតពិនិត្យបន្ថែមទៀត។

យ៉ាងណាមិញ បន្ទាប់ពីមើលរូបភាពហើយ អ្នកបច្ចេកទេសជាន់ខ្ពស់បានដឹងភ្លាមៗថា អ្វីដែលអ្នកស្រុកគិតថាជាកន្ទុយឆ្មានោះ គឺជាឧបករណ៍ម៉្យាងដែលប្រើសម្រាប់ការពាររលកសញ្ញានៃសេនស័រ ដែលឧបករណ៍នេះនឹងធ្វើការរៀបចំម៉ាស់ដែលធ្លាក់មក មិនឲ្យជាប់នឹងកន្លែងផ្សេង។

ហើយរឿងរ៉ាវគួរឲ្យអស់សំណើចនេះ បានទាក់ទាញចំណាប់អារម្មណ៍អ្នកនិយមលេងអ៊ីនធឺណេតជាច្រើន ពោលគឺនៅត្រង់បុគ្គលិកបាននិយាយថា ឆ្មានេះមិនមានកិ្លនទេ៕

សូមទស្សនារូបភាពខាងក្រោម៖