តារាចម្រៀង Tae Yang ខូចចិត្តយ៉ាងខ្លាំង បន្ទាប់ពីបាត់បង់សត្វឆ្កែចិញ្ចឹម

កាលពីពេលថ្មីៗនេះ តារាចម្រៀងប្រុស របស់ប្រទេសកូរ៉េខាងត្បូង Tae Yang មានការខូចចិត្តយ៉ាងខ្លាំង បន្ទាប់ពីមិត្តភក្តិដ៏ល្អ ដែលជាសត្វឆ្កែចិញ្ចឹមរបស់គាត់ មានឈ្មោះថា Boss បានងាប់កាលពីថ្ងៃទី១០ ខែមិថុនា ឆ្នាំ២០១៣ នេះ ដោយសារតែមានជំងឺធ្ងន់ធ្ងរ ហើយបានធ្វើការសង្គ្រោះដែរ ប៉ុន្តែនៅតែជួយសង្គ្រោះមិនបាន ។

យោងតាមប្រភពព័ត៌មាន All Kpop របស់ប្រទេសកូរ៉េ បានឲ្យដឹងថា តារាចម្រៀង Tae Yang បានសុំឲ្យប្រិយមិត្ត ដែលគាំទ្រគាត់ទាំងអស់ ចូលរួមកាន់ទុក្ខជាមួយគាត់ និងបន់ស្រន់ឲ្យ Boss បានទៅកាន់សុគតិភព។

ជាមួយគ្នានេះដែរ តារាចម្រៀង Tae Yang បានបង្ហាញពីអារម្មណ៏ឈឺចាប់ នៅលើបណ្តាញសង្គម Twitter ថា “Boss បាននាំការសប្បាយមកឲ្យខ្ញុំ អស់រយៈពេល ៥ឆ្នាំមកហើយ ប៉ុន្តែឥឡូវនេះវាបានខ្លាតឆ្ងាយពីខ្ញុំហើយ...វាតែងតែនៅក្នុងបេះដូង”។

យ៉ាងណាមិញ តារាចម្រៀង Tae Yang ក៏បានធ្វើការអរគុណទៅដល់គ្រូពេទ្យ ដែលបានព្យាយាម និងយកចិត្តទុកដាក់ មើលថែសត្វឆ្កែចិញ្ចឹមរបស់គាត់ អស់រយៈពេលយ៉ាងយូរផងដែរ៕

ដោយ ៖ ប៊ី

ខ្មែរឡូត