បែកធ្លាយពាក្យចចាមអារ៉ាមថា ព្រឹត្តិការណ៍ប្រកាសផលិតផលរបស់ Apple បន្ទាប់ នឹងធ្វើនៅថ្ងៃទី២៣ ខែមីនា

បរទេស៖ ក្រុមហ៊ុន Apple នឹងរៀបចំព្រឹត្តិការណ៍ដំបូងរបស់ខ្លួននៅឆ្នាំនេះ នៅថ្ងៃទី23 ខែមីនា​ នេះបើយោងតាមព័ត៌មានដែលផ្តល់ដោយកំពូលអ្នកចែកចាយព័ត៌មានបែកធ្លាយជនជាតិចិនដ៏ល្បីម្នាក់។ ក្រុមហ៊ុន Apple ត្រូវបានគេរំពឹងថានឹងដាក់ចេញនូវ AirTags, iPads ថ្មី និង AirPods ចុងក្រោយ នៅឯព្រឹត្តិការណ៍និទាឃរដូវមួយ ហើយអ្នកចែកចាយព័ត៌មានបែកធ្លាយឈ្មោះថា Kang ជឿជាក់ថាកាលបរិច្ឆេទនោះនឹងនៅថ្ងៃទី23 ខែមីនា។

Kang បាននិយាយថាព្រឹត្តិការណ៍របស់ Apple នឹងត្រូវធ្វើឡើងនៅកាលបរិច្ឆេទដូចគ្នានឹងថ្ងៃបញ្ចេញស្មាតហ្វូន OnePlus 9 ដែលគ្រោងធ្វើនៅថ្ងៃអង្គារ ទី23 ខែមីនា នេះដែរ។

ដោយសារតែវិបត្តិកូវីដជុំវិញពិភពលោក ព្រឹត្តិការណ៍របស់ Apple ត្រូវបានគេរំពឹងថានឹងធ្វើឡើងតាមឌីជីថល និងផ្សាយផ្ទាល់តាមរយៈគេហទំព័រ និងឆានែលយូធ្យូបផ្លូវការរបស់ខ្លួន។ គេទាយថាពីថ្ងៃទី23 ដល់ទី30 ខែមីនា គឺជាពេលវេលាដែលក្រុមហ៊ុន Apple នឹងរៀបចំព្រឹត្តិការណ៍មួយ។ Apple ច្រើនតែរៀបចំព្រឹត្តិការណ៍នៅថ្ងៃអង្គារ ហើយត្រូវបានគេរំពឹងថានឹងរៀបចំព្រឹត្តិការណ៍មួយនៅដើមនិទាឃរដូវ ដើម្បីឱ្យស្របពេលជាមួយនឹងការបញ្ចេញកម្មវិធី App Tracking Transparency នៅក្នុងប្រព័ន្ធ iOS 14.5 ដែរ។

ព័ត៌មានលម្អិតជាផ្លូវការអំពីព្រឹត្តិការណ៍របស់ក្រុមហ៊ុន Apple នៅមិនទាន់ដឹងនៅឡើយទេ។ ទោះយ៉ាងណា គេគិតថា AirTags‌ អាចបង្ហាញខ្លួននៅឯព្រឹត្តិការណ៍ថ្ងៃទី23 ខែមីនានេះ៕