អង់គ្លេស៖ រូបភាពបំភាន់ភ្នែក ដែលកំពុងទទួលបានការចាប់អារម្មណ៍មួយ បានបង្ហាញឱ្យឃើញ កប៉ាលមួយគ្រឿងកំពុងហោះពីលើផ្ទៃមហាសមុទ្រ នៅក្បែរឆ្នេរសមុទ្រប្រទេសអង់គ្លេស។ នេះបើតាមការចុះផ្សាយរបស់សារព័ត៌មាន Dailystar។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សរូបភាពមិនគួរឱ្យជឿមួយនេះ ត្រូវបានថតដោយ លោក David Morris ខណៈពេលលោកកំពុងធ្វើដំណើរតាមបណ្ដោយឆ្នេរសមុទ្រ ក្នុងទីក្រុង Falmouth Cornwall ប្រទេសអង់គ្លេស។ យ៉ាងណាមិញ ដើម្បីបំបាត់ភាពមន្ទិលសង្ស័យទៅលើរូបភាពមួយនេះ លោក David Braine អ្នកឯកទេសខាងឧតុនិយម ក៏បានចេញមកបកស្រាយដូចនេះថា រូបភាពបំភាន់ភ្នែកនេះ គឺបណ្ដាលមកពីកត្ដាសីតុណ្ហភាពដើរបញ្ច្រាសចូលគ្នា ពោលគឺខ្យល់ត្រជាក់ស្ថិតនៅជិតផ្ទៃមហាសមុទ្រ ឯចំណែកខ្យល់ក្តៅស្ថិតនៅពីលើវិញ ជាហេតុធ្វើឱ្យកាំពន្លឺបត់ឆ្ពោះសំដៅមករកភ្នែករបស់យើង ដែលឈរពីចម្ងាយនៅលើដីឬឆ្នេរសមុទ្រ ឱ្យឃើញរូបភាពប្លែកបែបនេះ៕