អង់គ្លេស៖ លោក Tony Adams ដែលជាអតីតប្រធានក្រុមកាំភ្លើងធំ Arsenal បាននិយាយថាទាំងខ្សែការពារ Hector Bellerin និង Cedric Soares សុទ្ធតែលេងមិនបានល្អនៅរដូវកាលនេះ និងចង់ឲ្យអតីតក្លិបរបស់លោកលៃលកលក់កីឡាករពីរនាក់នេះចេញ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
Adams ធ្លាប់រិះគន់លើទម្រង់លេងរបស់ Bellerin កាលពីមុនហើយពេល Cedic ផ្ទេរមកម្នាក់ទៀត លោកក៏អស់ការអត់ធ្មត់ព្រោះពួកគេទាំងពីរមិនខុសគ្នាអីប៉ុន្មានទេគឺលេងមិនបានល្អដូចតែគ្នាហ្នឹង។
Bellerin ដែលជាខ្សែការពារបណ្ដុះចេញពីថ្នាលយុវជន La Masia របស់ក្លិបអ្នកមានបុណ្យ Barcelona បានមកចូលរួមជាមួយ Arsenal តាំងពីឆ្នាំ២០១១មកនោះកំពុងទាក់ភ្នែកក្លិបសេដ្ឋីបារាំង Paris Saint-Germain និងសេះបង្កង់ Juventus ហើយពេលនេះកំពុងមានពាក្យចចាមអារ៉ាមថាក្រោយចប់រដូវកាលនេះ គេនឹងចាកចេញពីទឹកដី Emirates។
ចំណែក Cedric Soares វិញគឺលោកគ្រូបង្វឹក Mikel Arteta តែងតែដាក់គេឲ្យចូលលេងបើសិន Hector Bellerin និង ខ្សែការពារសញ្ជាតិស្កុដឡែន៍ Kieran Tierney រងរបួស។
ប៉ុន្តែយ៉ាងណាក៏លោក Adams នៅតែគិតថាបើ Arsenal ចង់ពង្រឹងក្រុមឲ្យខ្លាំងជាងនេះគឺត្រូវសម្លឹងរកខ្សែការពារណាដែលឆ្នើមៗជាង Bellerin និង Cedric ដោយលោកបានថ្លែងប្រាប់ Stadium Astro ថា៖
បើសិនក្លិបទិញកីឡាករថ្មីមកដោយលេងអន់ជាងកីឡាករចាស់ តើទិញមកធ្វើអីព្រោះវានៅតែមិនអាចជួយអ្វីបាននោះឡើយ។ Cedric ល្អជាង Bellerin? តើអ្នកមានមានមើលឃើញថាគេល្អមែនឬអត់ទេ? អ្នកប្រាប់ខ្ញុំថាក្លិបត្រូវការកីឡាករពីរនាក់នេះ? បើតាមគំនិតខ្ញុំ គឺគួរតែលក់ពីរនាក់នេះចោលទៅនិងយកកីឡាករឆ្នើមម្នាក់មកជំនួស។ បើគង់តែទិញកីឡាករអន់ជាងកីឡាករចាស់ដដែល អ្នកមិនបាច់ទិញមកទេ!
Arsenal អាចលក់ Bellerin បានដោយគ្មានបញ្ហាព្រោះមានក្លិបជាច្រើនចង់បានគេស្របពេល Cedric រាងពិបាកនឹងរកទីផ្សារដោយកីឡាករសញ្ជាតិព័រទុយកាល់រូបនេះបានចុះកុងត្រាដល់ទៅ៤ឆ្នាំដោយផ្ទេរពី Southampton ៕
ប្រភព៖ mirror
Bong I.T