អង់គ្លេស ៖ លោក John Barnes បានណែនាំឲ្យក្លិបហង្សក្រហម Liverpool ចូលប្រកួតប្រជែងជាមួយក្លិបបិសាចក្រហម Manchester United ក្នុងការទិញយកខ្សែការពារ Raphael Varane ពីក្លិបអធិរាជស Real Madrid នៅរដូវក្ដៅខាងមុខនេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
កីឡាករសញ្ជាតិបារាំងរូបនេះនឹងផុតកុងត្រាជាមួយក្លិបម្ចាស់ពាន UCL ១៣សម័យនៅឆ្នាំ២០២២នេះហើយ ទើប Real Madrid ចង់គិតគូលៃលកលក់ Varane ទៅឲ្យក្លិបណាដែលចង់បានគេព្រោះគេហាក់បីដូចជាមិនចង់បន្តកុងត្រាថ្មីជាមួយក្លិបឡើយ។
យោងតាមការរាយការណ៍ Raphael Varane ចង់ចាកចេញទៅស្វែងរកការប្រកួតប្រជែងថ្មីក្រោយស្នាក់នៅទឹកដី Santiago Bernabeu តាំងពីឆ្នាំ២០១១មក ខណៈដែល Manchester United កំពុងសម្លឹងចង់បញ្ចុះបញ្ចូលគេឲ្យមកលេងនៅ Premier League ។
កាលពីរដូវកាលមុន ភាគីរបស់លោកគ្រូបង្វឹក Ole Gunnar Solskjaer ព្យាយាមចរចាយក Varane មក Old Trafford ដែរតែបរាជ័យទើបរដូវកាលនេះ ក្លិបនឹងចូលប្រជែងទិញយកកីឡាករវ័យ ២៧ឆ្នាំរូបនេះឲ្យបានដើម្បីយកមកចាប់ដៃគូជាមួយប្រធានក្រុម Harry Maguire ។
ដោយមើលឃើញសមត្ថភាពរបស់ Varane លោក John Barnes គិតថា Liverpool គួរតែទិញយកកីឡាករម្នាក់នេះកាត់មុខកាត់មាត់ Man UTD ឲ្យបានព្រោះបញ្ហាកង្វះខ្សែការពារនៅ Liverpool នៅមិនទាន់ដោះស្រាយបានមួយរយភាគរយនៅឡើយទេបើទោះបីក្លិបបានទិញយក Ben Davies និងខ្ចីជើង Ozan Kabak មកក៏ដោយ។
លោក Barnes បានថ្លែងប្រាប់ BonusCodeBets ថា៖
គេ(Raphael Varane)ជាកីឡាករដែលផ្លាស់ទីលឿនណាស់ គេជាខ្សែការពារដ៏ល្អម្នាក់ អ៊ីចឹងហើយទើបខ្ញុំគិតថាគេអាចលេងត្រូវជើងជាមួយ Liverpool ។ ខ្ញុំគិតថាបើ Liverpool ទិញយក Varane មែន វានឹងក្លាយជារឿងមួយដ៏អស្ចារ្យ។ គេនឹងអាចជួយពង្រឹងក្រុមនៅ Premier League ទាំងអស់បានតែបើសិនគេចាកចេញពី Real Madrid មែននោះ ក្រុមជាច្រើនប្រាកដជាចូលប្រជែងទិញយកគេហើយ៕
ប្រភព៖ metro
Bong I.T