ឥណ្ឌូណេស៊ី៖ បន្ទុះភ្នំភ្លើង Sinabung ក្នុងប្រទេសឥណ្ឌូណេស៊ីកាលពីថ្ងៃទី០២ ខែមីនាម្សិលមិញនេះ បានព្រួសពពកផេះក្ដៅកម្ពស់ជាង ៥គីឡូម៉ែត្រឡើងទៅលើអាកាស ដែលជាការផ្ទុះដ៏ខ្លាំងក្លាលើកដំបូង ចាប់តាំងពីខែសីហា ឆ្នាំ២០២០មក។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សភ្នំភ្លើង Sinabung បានបញ្ចេញសកម្មភាពកាន់តែខ្លាំងឡើងចាប់តាំងពីខែសីហា ឆ្នាំមុនមកម្ល៉េះ ដែលបានផ្ដល់សញ្ញាដល់ពលរដ្ឋរស់នៅខេត្ដស៊ូម៉ាត្រាខាងជើង ក្នុងកម្រិតប្រុងប្រយ័ត្នខ្ពស់បំផុតទី២។ ហើយក្នុងហេតុការណ៍បន្ទុះភ្នំភ្លើងថ្ងៃម្សិលមិញនេះ មជ្ឈមណ្ឌលកាត់បន្ថយគ្រោះមហន្ដរាយភ្នំភ្លើង និងភូគព្ភសាស្ដ្ររបស់ឥណ្ឌូណេស៊ីបាននិយាយថា មិនមានអ្នកស្លាប់ និងរបួសទេនោះទេ ប៉ុន្ដែមន្ដ្រីបានជំរុញឲ្យប្រជាជននៅឲ្យឆ្ងាយពីររណ្ដៅភ្នំភ្លើងយ៉ាងហោចណាស់ ៣គីឡូម៉ែត្រ។
តួយ៉ាងតាមរយៈវីដេអូឃ្លីប និងរូបភាពនៃការផ្ទុះឡើងរបស់ភ្នំភ្លើង Sinabung បានបង្ហាញឲ្យឃើញពីពពកផេះក្រាស់ ខ្មួលខ្មាញ់ បានព្រួសឡើងទៅលើផ្ទៃអាកាស ដែលបានបង្កឲ្យពលរដ្ឋមួយចំនួនតូចមានការភិតភ័យផងដែរ។
គួរឲ្យដឹងថា ប្រទេសឥណ្ឌូណេស៊ីមានទីតាំងភូមិសាស្រ្តស្ថិតនៅលើ ខ្សែក្រវ៉ាត់ភ្នំភ្លើងប៉ាស៊ីហ្វិក (Pacific Ring of Fire) ជាតំបន់មានសកម្មភាពរញ្ជួយខ្លាំង ដែលមានផ្ទាំងផ្សេងៗគ្នានៅលើស្រទាប់ផែនដីជួបគ្នា និងបង្កើតជាការរញ្ជួយដី និងភ្នំភ្លើងមួយចំនួនធំ។ ជាក់ស្ដែង ប្រទេសនេះមានភ្នំភ្លើងសកម្មជិត ១៣០ ដែលច្រើនជាងប្រទេសដទៃទៀត៕
សូមទស្សនារូបភាព និងវីដេអូខាងក្រោម៖