មានរូបថតសល់ពីសង្គមចាស់? អាចសាកចូលគេហទំព័រមួយនេះ ដើម្បីបំលែងរូបភាព ឲ្យមានចលនារស់រវើកមកវិញ

បរទេស៖ ខាងផ្នែកសេវាកម្មបញ្ញាសិប្បនិម្មិត Deep Nostalgia ដែលធ្វើឲ្យរូបភាពនៅនឹងថ្កល់មានចលនា បានក្លាយជាប្រធានបទដ៏ពេញនិយមមួយនៅលើបណ្ដាញសង្គម Twitter ពីព្រោះមនុស្សជាច្រើនបានព្យាយាមបង្កើតរូបភាពរបស់ពួកគេឲ្យក្លាយជាវីដេអូ។ សេវាកម្ម Deep Nostalgia ផ្ដល់ជូនដោយក្រុមហ៊ុនពង្សាវិទ្យាតាមប្រព័ន្ធអនឡាញ MyHeritage បានប្រើប្រាស់អាជ្ញាប័ណ្ណបញ្ញាសិប្បនិម្មិត AI ពី D-ID ដើម្បីបង្កើត effect ដែលធ្វើឲ្យធ្វើរូបភាពនៅនឹងថ្កល់ចាប់ផ្ដើមធ្វើសកម្មភាព។

វាស្រដៀងគ្នានឹងមុខងារ Live Photos នៅលើប្រព័ន្ធប្រតិបត្តិការ iOS អ៊ីចឹងដែរ។ ប៉ុន្តែសេវាកម្ម Deep Nostalgia អាចធ្វើឲ្យរូបភាពនានាពីកាមេរ៉ាគ្រប់ប្រភេទ ឲ្យមានជីវិតរស់រវើក។ កម្មវិធីមួយនេះបានប្រើប្រាស់គំរូវីដេអូចាប់សម្គាល់ចលនាផ្ទៃមុខផ្លាស់ទី ហើយបានចាក់បញ្ចូលលក្ខណៈទាំងនេះដែលសាកសមមួយ ទៅក្នុងរូបភាពនៅនឹងថ្កល់។

គោលបំណងនៃកម្មវិធីនេះគឺអនុញ្ញាតឲ្យអ្នក ធ្វើការបង្ហោះរូបថតមនុស្សជាទីស្រលាញ់របស់អ្នក ហើយចង់ឃើញពួកគាត់មានចលនា។ អ្នកប្រើប្រាស់អាចចុះឈ្មោះសម្រាប់គណនីដោយឥតគិតថ្លៃ នៅលើគេហទំព័រ MyHeritage និងបន្ទាប់មកត្រូវបង្ហោះរូបចូល។ ដំណើរការមួយនេះនឹងធ្វើការដោយស្វ័យប្រវត្តិ ហើយគេហទំព័រមួយនេះក៏នឹងជួយកែកុនរូបភាពបន្ថែម មុនពេលប្ដូរវាឲ្យមានចលនា។

លើសពីនេះទៅទៀត រូបភាពដែលបង្ហោះចូលទៅក្នុងគេហទំព័រមួយនេះនឹងមិនចែកចាយបន្តទៅឲ្យភាគីទីបីនោះទេ។ មិនតែប៉ុណ្ណោះ រូបភាពដែលបានបង្ហោះចូលដោយមិនបានចុះឈ្មោះពេញលេញនឹងត្រូវបានលុបចេញដោយស្វ័យប្រវត្តិ ដើម្បីការពារសិទ្ធិឯកជនរបស់អ្នកប្រើប្រាស់។ អ្នកអាចបង្ហោះរូបភាពចំនួន៥ដោយឥតគិតថ្លៃចូលទៅក្នុងគេហទំព័រមួយនេះ បន្ទាប់ពីនោះអ្នកត្រូវបង់ថ្លៃសេវាកម្ម។ ជាចុងក្រោយ សូមប្រើប្រាស់ដោយការទទួលខុសត្រូវ៕