ក្នុងករណីឆ្លងច្រើន! ទីតាំងមួយនៃខេត្តកំពង់ស្ពឺ ត្រូវក្លាយជាកន្លែងពិនិត្យព្យាបាលជំងឺកូវីដ១៩ ខ្នាតធំ

នៅមជ្ឈមណ្ឌលអភិវឌ្ឍន៍ជនបទកម្ពុជា-កូរ៉េ ស្ថិតនៅក្នុងភូមិផ្គង់ សង្កាត់ច្បារមន ក្រុងច្បារមន ខេត្តកំពង់ស្ពឺ ត្រូវបានថ្នាក់ដឹកនាំក្រសួងអភិវឌ្ឍន៍ជនបទ ផ្តល់ជាទីតាំងសម្រាប់ការព្យាបាលផង និងការធ្វើចត្តាឡឺស័កផង ព្រោះថាទីតាំងនេះមានលក្ខណៈអំណោយផលក្នុងការគ្រប់គ្រង ខ្យល់អាកាសល្អ ពិសេសមានចំងាយសមស្របពីភូមិប្រជាជន។ ឯកឧត្តម វ៉ី សំណាង អភិបាលខេត្តកំពង់ស្ពឺ ដែលជាប្រធានគណៈកម្មការប្រឆាំងកូវីដ១៩ខេត្តកំពង់ស្ពឺ ក៏បានសរសើរទីតាំងនេះមានលក្ខណៈអំណោយផលក្នុងការព្យាបាលជំងឺកូវីដ១៩ ពីព្រោះមានប្រព័ន្ធទឹក ភ្លើងល្អ កន្លែងហាត់ប្រាណ ពិសេសបន្ទប់ស្នាក់នៅដែលមាន លក្ខណៈអំណោយផលងាយបំពាក់សម្ភារៈ និងងាយអនុវត្តបច្ចេកទេសព្យាបាលជំងឺរបស់ក្រសួងសុខាភិបាល ជាងទីតាំងបំរុងទុកផ្សេងៗក្នុងខេត្ត។ ទីតាំងនេះដែរ ត្រូវបានថ្នាក់ដឹកនាំកំពូលនៃក្រសួងសុខាភិបាលរួមមាន​ ឯកឧត្តមសាស្រ្ដាចារ្យ ម៉ម ប៊ុនហេង លោកជំទាវ យស់ សម្បត្តិ និងលោកជំទាវវេជ្ជបណ្ឌិត ឱ វណ្ណឌីន ព្រមទាំងសហការី បានអញ្ជើញចុះពិនិត្យមើលទីតាំងនេះកាលពីពេលថ្មីៗកន្លងទៅនេះផងដែរ។ យ៉ាងណាក៏ដោយ សូមបងប្អូនកុំមើលស្រាលស្ថានការណ៍ ហើយប្រកាន់យកវិធាន ៣ការពារ(ពាក់ម៉ាស់ លាងដៃ រក្សាគម្លាត)  និង ៣កុំ (កុំទៅកន្លែងមនុស្សច្រើន កុំនៅកន្លែងបិទជិត កុំប៉ះពាល់គ្នា) ដើម្បីចៀសវាងការឆ្លងជំងឺកូវីដ១៩ ទ្រង់ទ្រាយធំក្នុងសហគមន៍៕