ខឹងចិត្តរឿងអ៊ីនធើណេតធ្វើស៊ី! រដ្ឋមន្ត្រីឥណ្ឌាមួយរូប បានឡើងទៅអង្គុយនៅកន្ត្រកវិលរយៈពេល ២ ម៉ោងក្នុងមួយថ្ងៃដើម្បីធ្វើការ

ឥណ្ឌា៖ ដើម្បីសំណេះសំណាលជាមួយមន្ត្រីពាក់ព័ន្ធអំពីបញ្ហាដែលប្រជាជនជួបប្រទះ រដ្ឋមន្រ្តីមួយរូបនៅឥណ្ឌា គឺ លោក Brijendra Singh Yadav បានចំណាយពេល ២ ម៉ោងជារៀងរាល់ថ្ងៃ នៅលើកន្ត្រកវិលកម្ពស់ ១៥ ម៉ែត្រជាងពីដី  នៅឯស្រុក Ashoknagar រដ្ឋ Madhya Pradesh ប្រទេសឥណ្ឌា ខណៈលោកមានបញ្ហាជាមួយប្រព័ន្ធអ៊ីនធើណេតដែលមិនមានសេវា។

លោក Singh Yadav បានលើកឡើងយ៉ាងដូច្នេះថា ការដែលលោកឡើងមកអង្គុយនៅលើកន្ត្រកដែលខ្ពស់ផុតពីដីបែបនេះ ក៏ព្រោះតែលោកមិនអាចចូលប្រើប្រាស់ប្រព័ន្ធអ៊ីនធើណេតចល័តនៅតំបន់នោះបាន ហើយលោកត្រូវមកស្នាក់នៅតំបន់ខាងលើដើម្បីបំពេញការងារចំនួន ៩ ថ្ងៃទៀត។ ហើយអ៊ីនធើណេតហាក់មិនអំណោយផលសោះ ធ្វើឱ្យលោកមិនអាចធ្វើការបានឡើយ ជាហេតុទើបលោកសម្រេចឡើងមកអង្គុយលើកន្ត្រកដ៏ខ្ពស់នេះដើម្បីងាយស្រួលក្នុងការចាប់យកសេវាអ៊ីនធើណេតមកប្រើប្រាស់៕