មាស សុខសោភា ស្រាយចម្ងល់ក្នុងចិត្តហ្វេន ទម្លាយមូលហេតុដែលចុះកុងត្រា ជាមួយផលិតកម្ម រាម!

អាចនិយាយបានថា នេះជានិស្ស័យ ធ្វើឲ្យពួកយើងបានមកជួប និងរួមសហការជាមួយគ្នា បើទោះបីជាផលិតកម្មរាម ជាផលិតកម្មថ្មីថ្មោងនៅឡើយ ប៉ុន្តែអ្វីដែលនាងខ្ញុំពេញចិត្ត គឺផលិតកម្មរាម មានគោលដៅ និងគោលបំណងតែមួយដូចជានាងខ្ញុំ គឺពួកគាត់ពិតជាមានបេះដូង ស្រលាញ់វិស័យសិល្បៈនេះ ដោយមិនរំពឹងចង់បានអ្វីត្រលប់ទៅវិញឡើយ។ ម៉្យាងខាងផលិតកម្មរាម គឺពិតជាបានផ្ដល់ឲ្យ នូវអ្វីដែលតារាចម្រៀងជើងចាស់ម្នាក់ដូចជានាងខ្ញុំត្រូវការ រួមមានការជួយគាំទ្រ ទាំងជាកម្លាំងចិត្ត និងជាទុនក្នុងការផលិត ដើម្បីបន្តក៏ដូចជាអភិវឌ្ឍន៍ លើកស្ទួយវិស័យសិល្បៈខ្មែរយើង ឲ្យកាន់តែរីកដុះដាល លើឆាកអន្តរជាតិ។ ពិសេសនាងខ្ញុំមានអារម្មណ៍ថា មានសន្តិភាពផ្លូវចិត្ត និងមានសុវត្ថិភាព ចាប់តាំងពីពេលបានជួបពួកគាត់ (ក្រុមការងារខាងផលិតកម្មរាម) ជាលើកដំបូងមកម៉្លេះ។ ដូច្នេះនាងខ្ញុំគិតថា មិនគួរបោះបង់ឳកាសល្អនេះចោលងាយៗទេ ទើបធ្វើការសម្រេចចិត្ត សហការជាមួយផលិតកម្មរាម ដោយមិនរារែក។

ខ្ញុំសូមបញ្ជាក់ថា ផលិតកម្មរាម បង្កើតឡើងមក មិនមែនដើម្បីប្រកួតប្រជែងផលិតកម្មនៅក្នុងស្រុកទេ គោលដៅ ក៏ដូចជាចក្ខុវិស័យរបស់ពួកយើងធំបំផុត គឺពួកយើងមានមហិច្ឆិតា ចង់ពាំនាំយកនូវអរិយធម៌ខ្មែរទៅកាន់បរទេស។ យើងចង់ឲ្យពិភពលោក បានស្គាល់ពីកម្ពុជា ដូច្នេះបងប្អូននឹងអាចមើលឃើញថា គ្រប់សកម្មភាពរបស់ផលិតកម្មរាម គឺមិនប្រកួតប្រជែង យកឈ្នះយកចាញ់ជាមួយផលិតកម្មនៅក្នុងស្រុកឡើយ។ យើងព្យាយាមសហការ ហើយពួកយើងក៏មាននូវគោលការ ក្នុងការផលិតតែវីដេអូ ឬក៏ចម្រៀងដែលមានគុណភាព ដូច្នេះពួកយើងនឹងមិនផលិតចម្រៀងច្រើនពេកនោះទេ យើងផលិតតិច តែខ្លឹម ពោរពេញដោយគុណភាព។ លើសពីនេះទៅទៀត ផលិតកម្មរាម មានគោលជំហរមួយ ដើម្បីឲ្យពិភពលោក បានស្គាល់ពីខ្មែរយើង ពួកយើងគិតថាខ្មែរយើង មិនគួរយកឈ្នះគ្នាឯងទេ ដូច្នេះគ្រប់ផលិតកម្មណា ផលិតករណា ឬតារាចម្រៀងណាដែលខ្វះខាតធនធាន គិតថាខ្លួនមានសមត្ថភាព គាត់អាចស្នើរសុំ ក៏ដូចជាមកសិក្សាជាមួយផលិតកម្មរាមបាន។