អ៊ីតាលី៖ កាលពីយប់ថ្ងៃព្រហស្បតិ៍ឈានចូលថ្ងៃសុក្រកន្លងទៅនេះ ក្លិបបិសាចក្រហម Manchester United បានធ្វើដំណើរទៅកាន់ទីក្រុង ទូរីន ប្រទេសអ៊ីតាលី ដើម្បីធ្វើការប្រកួតវគ្គ៣២ក្រុមពាន Europa League ជាមួយ Real Sociedad នៅឯកីឡដ្ឋាន Juventus Stadium ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សនេះជាការប្រកួតបើកឆាកដំបូងគេបង្អស់ក្នុងក្របខណ្ឌ Europa League នៅរដូវកាលនេះ ដោយ Man UTD ទទួលបានលទ្ធផលត្រចះត្រចង់ណាស់គឺលត់ក្រុម Real Sociedad ក្នុងលទ្ធផល៤ទល់នឹង ០ មិនឲ្យតដៃរួច។
១គ្រាប់ដំបូងរបស់ Man UTD បើកឆាកស៊ុតដោយខ្សែបម្រើ Bruno Fernandes ពេលក្រុមទើបតែលេងបានជាង២៧នាទីពេលគេស៊ុតមួយជើងបញ្ចូលទីយ៉ាងស្រួលក្រោយអូសបាល់កាត់មុខខ្សែការពារនិងអ្នកចាំទីឲ្យរត់បុកគ្នាដួលត្រឡប់ត្រឡិន។
រហូតដល់នៅនាទីទី៥៧ Fernandes ដាក់ថែម១គ្រាប់ទៀតពេលខ្សែបម្រើ Daniel James បណ្ដើរបាល់កាត់ខ្សែការពារ Real Sociedad តែម្នាក់ឯងតម្រង់ទៅកាន់តំបន់គ្រោះថ្នាក់មុននឹងបញ្ជូនខ្លីៗទៅឲ្យ Fernandes ទើបរូបគេស៊ុតមួយជើងចំពាក់កណ្ដាលទីពីចម្ងាយ ដោយអ្នកចាំទី Alex Remiro ប្រឹងស្ទុះចេញមកទប់បាល់តែមិនសម្រេច។
២គ្រាប់នាំមុខរបស់ Man UTD ធ្វើឲ្យក្រុមកាន់តែមានទឹកចិត្តស្រេកឃ្លានជ័យជម្នះ ជាក់ស្ដែង នៅនាទីទី៦៤ ខ្សែប្រយុទ្ធ Marcus Rashford បណ្ដើរបាល់ឡើងទៅខាង Real Sociedad តែម្នាក់ឯងគត់ដោយមានខ្សែការពារម្នាក់ប្រឹងរត់មកប្រជែងយកបាល់តែគេសម្រេចចិត្តស៊ុតមួយជើងស្តាំពីចម្ងាយម្ដងទៀតដោយអ្នកចាំទី Remiro បានត្រឹមគ្រវីក្បាលដោយបាល់នេះបញ្ជូនពីខ្សែបម្រើ Fred ។
ស្រាប់តែនៅនាទីទី៩០ចុងម៉ោងទៅហើយ ខ្សែបម្រើ Daniel James ឆ្លៀតស៊ុតមួយជើងដោយខ្លួនឯងដោយមិនមានការបញ្ជូនពីអ្នកណានោះឡើយដែលជួយឲ្យ Manchester United ស្រវាយកជ័យជម្នះបន្តក្ដីសង្ឃឹមក្នុងការលើកពាន Europa League ។
ចំពោះស្ថិតិនៃការប្រកួតគឺ Man UTD គ្រប់គ្រងបាល់បានតែ៤០%ប៉ុណ្ណោះខណៈ Real Sociedad បាន៦០% និងស៊ុតចំគោលដៅ២ដង ឯ Man UTD ស៊ុតបាន១០ដង។
យ៉ាងណាមិញ Man UTD នៅត្រូវប្រកួតជើងទី២ជាមួយ Real Sociedad នៅថ្ងៃទី២៦ខែកុម្ភៈនេះហើយ៕
សូមទស្សនាវីដេអូនៃការប្រកួតខាងក្រោមនេះ៖
ប្រភព៖ goal