អង់គ្លេស៖ អតីតខ្សែប្រយុទ្ធរបស់បិសាចក្រហម Manchester United និង Tottenham Hotspur គឺលោក Teddy Sheringham បានរិះគន់លោកគ្រូបង្វឹក Jose Mourinho នៃក្លិបខ្នាយមាន់មាស Tottenham Hotspur ថា លោកគ្រូជាមនុស្សគ្មានទំនួលខុសត្រូវ រកស្រណុកតែខ្លួនឯង និងតែងតែបន្ទោសកីឡាករពេលក្រុមខ្លួនប្រកួតចាញ់តែបើប្រកួតឈ្នះវិញគឺលោកគ្រូតែងតែលើកសរសើរថាមកពីទម្រង់លេងរបស់ខ្លួនឯង។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
លោកគ្រូ Mourinho បានក្លាយទៅជាគ្រូបង្វឹកដ៏មានកេរ្តិ៍ឈ្មោះបោះសំឡេងមួយរូបកំឡុងពេលជិត២០ឆ្នាំមកនេះដោយធ្លាប់ដឹកនាំក្លិប Porto, Chelsea, Real Madrid និង Manchester United ហើយឥលូវនេះក៏កំពុងដឹកនាំ Spurs ប៉ុន្តែស្ថានភាពនៅក្នុងក្រុមមិនមានផលវិជ្ជមាននោះឡើយដោយក្លិបមួយនេះធ្លាក់ទៅឈរដល់លេខរៀងទី៩ឯណោះ។
ដោយឃើញដូច្នេះលោក Teddy Sheringham ក៏បានថ្លែងរិះគន់លោកគ្រូ Mourinho តាមរយៈគេហទំព័រ Goal ថា៖
អ្នកតែងតែឃើញ Jose បែបហ្នឹង ត្រូវឬអត់? បើនិយាយឲ្យវាសុភាព គឺ ពេលក្រុម Tottenham ចាញ់ វាមកពីក្រុមនិងកីឡាករខ្លួនឯង តែបើ Tottenham ឈ្នះវិញណា គឺ Jose តែងតែថាមកពីខ្លួនគាត់ ហ្នឹងហើយជាអ្វីដែលគាត់តែងតែធ្វើ។ គាត់កំពុងមានកាតព្វកិច្ចដ៏លំបាកលំបិនមួយក្នុងដៃគឺការប្រកួតទល់នឹង Manchester City ក្នុងពាន Carabao Cup វគ្គផ្ដាច់ព្រ័តនៅខែមេសានេះហើយ ខ្ញុំសង្ឃឹមថាគាត់នឹងបានពាននេះទៅចុះ។ ការពិតទៅ Spurs ពិតជាធ្វើបានល្អណាស់ក្រោមការដឹកនាំរបស់គ្រូបង្វឹក Pochettino បើទោះបីជាគាត់មិនបានដឹកនាំឲ្យក្រុមឈ្នះពានអ្វីក៏ដោយ។ ខ្ញុំសង្ឃឹមថា Jose នឹងធ្វើបាន។
គួរបញ្ជាក់ផងដែរថា លោកគ្រូបង្វឹក Jose Mourinho តែងតែទម្លាក់កំហុសទៅឲ្យកីឡាករក្នុងក្រុមជារឿយៗបើសិនកីឡាករម្នាក់នោះលេងមិនបានល្អ ដូចជាការប្រកួតបើករដូវកាលអ៊ីចឹង លោកគ្រូបានរិះគន់កីឡាករថាខ្ជិលណាស់អីជាដើម៕
ប្រភព៖ goal
Bong I.T