ឃើញលេងត្រូវជើងជាមួយក្រុម! Arsenal គ្រោងនឹងទិញផ្ដាច់កីឡាករខ្ចីជើង២នាក់នេះតែម្ដង

អង់គ្លេស៖ យោងតាមសេចក្ដីរាយការណ៍ ក្លិបកាំភ្លើងធំ Arsenal គ្រោងនឹងចុះកិច្ចព្រមព្រៀងទិញយកខ្សែបម្រើ Dani Ceballos និងអ្នកចាំទី Mat Ryan ផ្ដាច់តែម្ដងក្រោយកីឡាករពីរនាក់នេះបានមកលេងខ្ចីជើងនៅទឹកដី Emirates។

Dani Ceballos ត្រូវ Arsenal ខ្ចីជើងពី Real Madrid ខណៈ Mat Ryan គឺខ្ចីជើងពីក្លិប Brighton ហើយកុងត្រាខ្ចីជើងរបស់ពួកគេនឹងអស់សុពុលភាពនៅចុងរដូវកាលនេះហើយ។

ប៉ុន្តែផ្អែកតាមប្រភព SunSport បានបង្ហើបឲ្យដឹងថាលោកគ្រូបង្វឹក Mikel Arteta ចង់ទិញពួកគេទាំងពីរពីក្លិបរៀងៗខ្លួនផ្ដាច់តែម្ដងស្របពេលលោកប្រធាន Edu ក៏អាចនឹងកំពុងធ្វើការព្រមព្រៀងបណ្ដើរៗហើយដែរ។

ទន្ទឹមនឹងនោះដែរ Arsenal ក៏មានបំណងចង់ចរចារឿងថ្លៃប្រាក់ឈ្នួលរបស់ ខ្សែបម្រើ Martin Odegaard ជាមួយក្លិប Real Madrid ដែរដោយត្រូវការកាត់បន្ថយប្រាក់ថ្លៃហត់នឿយរបស់គេខ្លះ។

ទោះបីមិនទាន់ដល់ថ្នាក់ក្ស័យធនឬប្រឈមនឹងវិបត្តិហិរញ្ញវត្ថុក៏ Arsenal ចាំបាច់ត្រូវបន្ធូរបន្ថយការចំណាយខ្លះដោយកន្លងមកក្លិបបានដោះលែង Mesut Ozil, Shkodran Mustafi និង Sokratis Papastathppoulos រួចមកហើយ។

គួររម្លឹកផងដែរថា Dani Ceballos មកខ្ចីជើងនៅ Arsenal បាន២រដូវកាលហើយពោលគឺតាំងពីឆ្នាំ២០១៩ មកម៉្លេះដោយគេបង្ហាញខ្លួនសរុបបាន៦២ដង និងរកបាន២គ្រាប់គត់ ខណៈ Mat Ryan ទើបតែបង្ហាញខ្លួនបាន១ដងគត់៕

ប្រភព៖ thesun