លោកស្រី ឱ វណ្ណឌីន ច្រានចោលទាំងស្រុងចំពោះព័ត៌មានក្លែងក្លាយ ទាក់ទងនឹងការស្លាប់របស់អ្នកគ្រូ ឆន ណារី

កម្សាន្ត៖ បន្ទាប់ពីបែកធ្លាយព័ត៌មានពីផេកហ្វេសប៊ុក Hai Khmerkrom ដោយបានអះអាងថា អ្នកគ្រូ ឆន ណារី បានទទួលមរណភាពដោយសារតែការចាក់វ៉ាក់សាំងកូវីដ១៩ Sinopharm របស់ចិន។

ដោយមិនបង្អង់យូរ រដ្ឋលេខាក្រសួងសុខាភិបាល លោកជំទាវវេជ្ជបណ្ឌិត ឱ វណ្ណឌីន បានចេញមុខធ្វើការបកស្រាយទាក់ទងនឹងបញ្ហានេះថា រហូតមកទល់ពេលនេះ ពុំទាន់មានគ្រូបង្រៀនណាម្នាក់ បានចាក់វ៉ាក់សាំង Sinopharm ចិន នៅឡើយទេ ដូច្នេះ លោកជំទាវ បានស្នើសុំអាជ្ញាធរមានសមត្ថកិច្ច ចាត់វិធានការតាមផ្លូវច្បាប់ជាធរមានចំពោះជនបំពុលសង្គមនេះ។

ដោយឡែក ជាក់ស្តែង តាមការផ្សព្វផ្សាយបញ្ជាក់ផ្លូវការរបស់​លោកគ្រូនាយកសាលាវិទ្យាល័យ ស្នួល បានបញ្ជាក់ថា អ្នកគ្រូ ឆន ណារី បានស្នើសុំច្បាប់លោកគ្រូ ចាប់ពីថ្ងៃទី០១ ខែកុម្ភៈ ដល់ថ្ងៃទី ១៦ ខែកុម្ភៈ ឆ្នាំ២០២១ ដោយមូលហេតុបញ្ជាក់ថា អ្នកគ្រូសុំច្បាប់ ដើម្បីសម្រាកព្យាបាលជម្ងឺនៅមន្ទីរពេទ្យ។

ក្នុងនោះដែរ មន្ទីរពេទ្យកាល់ម៉ែត ក៏បានបញ្ជាក់បន្ថែមថា អ្នកគ្រូ ឆន ណារី ពិតជាបានសម្រាកព្យាបាលជម្ងឺរបស់អ្នកគ្រូ នៅមន្ទីរពេទ្យផងដែរ៕

ដើម្បីជ្រាបកាន់តែច្បាស់ សូមទស្សនារូបភាពខាងក្រោម៖