រាជធានីភ្នំពេញ ៖ បុរសម្នាក់ដោយសារតែស្រឡាញ់ប្រពន្ធលើសពីជីវិតរបស់ខ្លួន តែបែរជានាងចាកចេញពីផ្ទះអស់រយៈពេលជាច្រើនខែមិនឃើញត្រឡប់មកផ្ទះវិញ ក៏ផឹកថ្នាំកណ្តុរដើម្បីបញ្ចប់ជីវិត តែត្រូវសាច់ញាតិឃើញទាន់បញ្ជូនទៅសង្គ្រោះនៅមន្ទីរពេទ្យកាល់ម៉ែត កាលពីវេលាម៉ោង៣រសៀលថ្ងៃទី៩ មេសា ។ អំពើរបស់បុរសរូបនេះមានន័យថា បើគ្មានអូនបងរស់ក៏គ្មានន័យដែរ ។
បុរសដែលស្រឡាញ់ប្រពន្ធចាក់ទឹកមិនលិច ហើយផឹកថ្នាំកណ្តុរប៉ងសម្លាប់ខ្លួននេះឈ្មោះពេជ្រ មែន អាយុ២២ឆ្នាំ ធ្វើស្រែចម្ការ ស្នាក់នៅភូមិភ្នំប្រាំពីរ ឃុំចក្រី ស្រុកភ្នំព្រឹក ខេត្តបាត់ដំបង រីឯប្រពន្ធឈ្មោះយ៉ិត គឹមហៀង អាយុ២០ឆ្នាំ មានស្រុកកំណើតនៅភូមិជើងខ្នារ ឃុំពន្លៃ ស្រុកបរិបូណ៌ ខេត្តកំពង់ឆ្នាំង ។
សាច់ញាតិនិយាយឱ្យកោះសន្តិភាពដឹងថា ពេជ្រ មែន បានរៀបការជាមួយនាងយ៉ិត គឹមហៀង នៅថ្ងៃទី១១ មិថុនា ឆ្នាំ២០១១ នៅផ្ទះខាងស្រី ។ ពិធីមង្គលការនេះមិនមានការបង្ខិតបង្ខំពីភាគីណាមួយទេ គឺពួកគេទាំងពីរនាក់យល់ព្រមស្មោះស្ម័គ្រស្រឡាញ់គ្នាដល់ចាស់កោងខ្នងរៀងៗខ្លួន និងពិធីការបានដំណើរការចប់ចុងចប់ដើមយ៉ាងរលូន ។ ក្រោយពីស្នាក់នៅផ្ទះខាងស្រីអស់មួយរយៈពួកគេទាំងពីរនាក់បានកាន់ដៃគ្នាធ្វើដំណើរមកនៅខាងប្រុសឯភូមិភ្នំប្រាំពីរ ឃុំចក្រី ស្រុកភ្នំព្រឹក ខេត្តបាត់ដំបង ដោយប្រកបរបរធ្វើស្រែចម្ការ ។
ទាំងពីនាក់ប្តី-ប្រពន្ធមិនដែលត្អូញត្អែរពីការលំបាកឡើយ ពួកគេស្រឡាញ់គ្នាបាត់មុខមិនបាន ទៅណាមកណាតែពីរនាក់ ចំណែកឪពុកក្មេក-ម្តាយក្មេកក៏ស្រឡាញ់កូនប្រសាស្ទើរលេប ព្រោះនាងជាប្រតិបត្តិបានល្អក្នុងនាមជាកូនប្រសាស្រី ។
គ្មានឪពុកម្តាយណាមិនសប្បាយចិត្តពេលឃើញកូនចេះស្រឡាញ់គ្នាចាក់ទឹកមិនលិចនោះទេ ក៏ប៉ុន្តែនៅលើលោកនេះមិនមានអ្វីទៀងទាត់ទេ គឺស្រាប់តែនៅថ្ងៃទី១២ មីនា ឆ្នាំ២០១២ នាងយ៉ិត គឹមហៀង បានបាត់ពីផ្ទះមិនដឹងមូលហេតុ ។ លុះបានបីថ្ងៃទើបឮដំណឹងថា នាងធ្វើដំណើរទៅខេត្តព្រះវិហារ តែមិនដឹងជាទៅជាមួយអ្នកណាទេ ។ បញ្ហានេះធ្វើឱ្យក្រុមគ្រួសារ ជាពិសេសបុរសជាប្តីខ្វាយខ្វល់យ៉ាងខ្លាំងពីសុវត្ថិភាពប្រពន្ធរបស់ខ្លួន។ ដោយសារតែការស្រឡាញ់ឪពុកក្មេកក៏ផ្ញើលុយតាមរយៈក្រុមហ៊ុនវីង ដើម្បីឱ្យនាងជាកូនប្រសាធ្វើសោហ៊ុយវិលប្រឡប់មកជួបជុំក្រុមគ្រួសារ ហើយការទាក់ទងតាមទូរស័ព្ទទៅនាងយ៉ិត គឹមហៀង បានរហូតតែនាងមិនប្រាប់ពីទីកន្លែងច្បាស់លាស់ឡើយហាក់ដូចជាមានអ្វីគំរាមកំហែងនាងជានិច្ច ។
តាមប្រភពព័ត៌មានបន្តថា ក្រោយមកទៀតបុរសជាប្តីបានទូរស័ព្ទទៅប្រពន្ធថ្លែងពីទឹកចិត្តអាណិតស្រឡាញ់នាងកាន់តែខ្លាំងក្លា ខណៈពេលនាងចាកចេញពីផ្ទះអស់រយៈពេលជាច្រើនខែ ។បុរសជាប្តីព្យាយាមអង្វរករភរិយាឲ្យត្រឡប់មកផ្ទះវិញ ហើយរឿងកន្លងផុតទៅនោះចាត់ទុកថា ជាការយល់សប្តីទៅចុះ។ ប៉ុន្តែនៅពេលថ្មីៗនេះពេលប្តីនាងទូរស័ព្ទទៅនាងលើកទូរស័ព្ទនិយាយ តែនិយាយបណ្តើរយំបណ្តើរ និងមានការគំរាមឲ្យឈប់និយាយពីបុរសម្នាក់ដែលនៅក្បែរនាង។ តាមការលេចឮព័ត៌មានថា នាងយ៉ិត គឹមហៀង ទំនងកំពុងរស់នៅឯខេត្តកំពត តែមិងដឹងនៅជាមួយអ្នកណាទេ ។
សាច់ញាតិបុរសខូចចិត្តបន្តថា ក្រោយពីប្រពន្ធចាកចោលពីទ្រូងមិនដឹងពីមូលហេតុបែបនេះធ្វើឱ្យ ពេជ្រ មែន លែងហូបបាយចូល គឺផឹកតែទឹកនិងមួយថ្ងៃៗឈរសញ្ជប់សញ្ជឹងម្នាក់ឯងលែងនិយាយរកសាច់ញាតិហាក់ដូចជាមនុស្សគ្មានវិញ្ញាណក្នុងខ្លួនហើយបានចាកចេញពីស្រុកកំណើតមកផ្ទះម្តាយមីងនៅឯសង្កាត់ស្រះចក ខណ្ឌដូនពេញ ដើម្បីស្វែងរកប្រពន្ធក្រែងព្រះលោកជួយឲ្យជួបនាងវិញ ព្រោះឮថា នាងយ៉ិតគឹមហៀងទំនងជាចាញ់បោកគេត្រូវគេយកទៅលាក់នៅខេត្តកំពត ។ បុរសជាប្តីបានប្រាប់ម្តាយមីងថា ខ្លួនគេមិនយកទោសពៃរ៍អ្វីឡើយចំពោះប្រពន្ធឲ្យតែនាងវិលមករួមរស់ជាមួយគ្នាវិញ ។
លោកតា លោកយាយរបស់បុរសខូចចិត្តបានអង្វរករចៅប្រុសឲ្យឈប់គិតនិងខិតខំកាត់ចិត្តពីប្រពន្ធទៅ តែគេនៅតែមិនព្រមស្តាប់ ហើយក៏មិនហូបបាយដែរ ។
សាច់ញាតិបញ្ជាក់ថា នៅរសៀលថ្ងៃទី៩ មេសា បុរសខូចចិត្តនេះបានទិញថ្នាំបំពុលសត្វកណ្តុរយកមកទុកក្នុងកាបូបស្ពាយ ហើយផឹកអស់ជាច្រើនកញ្ចប់ តែត្រូវសាច់ញាតិឃើញទាន់នាំគ្នាដឹកទៅកាន់មន្ទីរពេទ្យកាល់ម៉ែតដើម្បីសង្គ្រោះជីវិត ។
គ្រូពេទ្យបានឲ្យក្រុមគ្រួសារដឹងថា ពេជ្រមែន បានរួចផុតពីសេចក្តីស្លាប់ហើយដោយសារថ្នាំមិនទាន់ជ្រួតជ្រាបពេញខ្លួន តែបើមកយឺតពេលវិញពិតជាស្លាប់មិនខានឡើយ ។
តាមរយៈសារព័ត៌មានកោះសន្តិភាពសាច់ញាតិក៏ដូចជាបុរសជាប្តីបានអង្វរដល់នាងយ៉ិត គឹមហៀង ឲ្យវិលត្រលប់ទៅរួមរស់ជាមួយប្តីវិញ ៕ វិលវិញមកអូន!
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
