សពពលករខ្មែរ ៤នាក់ស្លាប់ ដោយគ្រោះថ្នាក់ចរាចរនៅថៃ ត្រូវបានបញ្ជូន ត្រឡប់មក ស្រុកកំណើតវិញ

បន្ទាយមានជ័យ៖ សពពលករខ្មែរ ចំនួន ៤នាក់ ដែលបានស្លាប់បាត់បង់ជីវិត នៅប្រទេសថៃ ដោយគ្រោះថ្នាក់ចរាចរ ត្រូវបាន អគ្គកុងស៊ូលកម្ពុជា ប្រចាំនៅខេត្តស្រះកែវ ប្រទេសថៃ បានបញ្ជូន ត្រឡប់មកខ្មែរវិញ តាមច្រកទ្វារអន្តរជាតិ ប៉ោយប៉ែត ក្រុង ប៉ោយបែត កាលពីវេលាម៉ោង ៤និង៣០នាទី ល្ងាចថ្ងៃទី០១ ខែមិថុនា ឆ្នាំ២០១៣។

យោងតាមការផ្សព្វផ្សាយ របស់អគ្គស្នងការដ្ឋាន នគរបាលជាតិ បានឲ្យដឹងថា សពជនរងគ្រោះទាំង ៤នាក់ នោះ រួមមាន ទី១- ឈ្មោះ ផល យ៉ែម ភេទស្រី អាយុ ៥៨ឆ្នាំ ទី២- ឃឹម ជី ភេទស្រី អាយុ ២៨ឆ្នាំ ទី៣-ចក់ ផែម ភេទប្រុស អាយុ ៥៨ឆ្នាំ ពលករខ្មែរ ទាំងបីនាក់ មានទីលំនៅភូមិចារ ឃុំព្រៃរំដេង ស្រុកមេសាង ខេត្តព្រៃវែង ត្រូវក្រុមគ្រួសារ ចាត់ចែងបូជា នៅវត្ត បាលិលេយ្យ សង្កាត់ប៉ោយប៉ែត ក្រុងប៉ោយប៉ែត និងទី៤-ឈ្មោះ ផាត់ បេន ភេទប្រុស អាយុ ៤៩ឆ្នាំ នៅភូមិតាសៀវ ឃុំគោកកឋិន ស្រុកថ្មពួក ខេត្តបន្ទាយមានជ័យ ត្រូវក្រុមគ្រួសារ យកទៅចាត់ចែងបូជា ធ្វើបុណ្យតាមប្រពៃណី នៅគេហដ្ឋានសព នៅភូមិឃុំខាងលើ ។

អគ្គស្នងការដ្ឋាននគរបាលជាតិ បានឲ្យដឹងទៀតថា សាកសពជនរងគ្រោះ ដែលបញ្ជូនមកនេះ បានស្លាប់ដោយគ្រោះថ្នាក់ ចរាចរ កាលពីថ្ងៃទី២៨ ខែឧសភា ឆ្នាំ២០១៣ នៅខេត្តឆាកឆឹងសៅ ប្រទេសថៃ៕

     ដោយ ៖ ដើមអម្ពិល

ផ្តល់សិទ្ធដោយ ដើមអម្ពិល