ពោតបារាំងជាប្រភេទបន្លែដែលមានរសជាតិឆ្ងាញ់ងាយស្រួលក្នុងការចម្អិន និងបរិភោគ ដែលប្រជាជនពេញនិយមបរិភោគជាច្រើន។ មិនតែប៉ុណ្ណោះ វាក៏មានគុណសម្បត្តិជាច្រើនចំពោះសុខភាព ដែលយើងមិនគួរមើលរំលង។ វាសំបូរទៅដោយជាតិម៉ាញ៉េស្យូម ជាតិសរសៃ អង់ទីអុកស៊ីដង់ វីតាមីន C និងវីតាមីន K1 ដែលផ្តល់អត្ថប្រយោជន៍ដល់ស្ត្រីមានផ្ទៃពោះ សុខភាពបេះដូងនិងការគ្រប់គ្រងជាតិស្ករក្នុងឈាមជាដើម។
១. ជួយបង្ការជំងឺទឹកនោមផ្អែម
ពោតបារាំងសម្បូរជាតិសរសៃច្រើន ដែលធ្វើឱ្យកម្រិតជាតិស្ករក្នុងឈាមមានស្ថេរភាព។ តាមការស្រាវជ្រាវបានបង្ហាញទៀតថា ពោតបារាំងក៏អាចកាត់បន្ថយកម្រិតជាតិស្ករក្នុងឈាម ដែលធ្វើអោយរុក្ខជាតិមួយប្រភេទនេះជាប្រភេទអាហារដ៏ល្អចំពោះអ្នកជម្ងឺទឹកនោមផ្អែម។
២. អាចជួយបញ្ចុះបរិមាណកូឡេស្តេរ៉ុល
ការបរិភោគពោតបារាំងអាចជួយកាត់បន្ថយកូឡេស្តេរ៉ុលក្នុងឈាម ដែលអាចការពារអ្នកបរិភោគពីជំងឺដូចជាជំងឺលើសឈាម ជំងឺដាច់សរសៃឈាមខួរក្បាល និងជំងឺបេះដូងជាដើម ដែលកើតចេញពីការលើសបរិមាណកូឡេស្តេរ៉ុល។
៣. វាល្អសម្រាប់ការរំលាយអាហារ
ជាតិសរសៃនៃពោតបារាំង គឺជួយឱ្យអ្នកមានអារម្មណ៍ថាឆ្អែតបានយូរ ហើយវាល្អសម្រាប់ប្រព័ន្ធរំលាយអាហារ។ ជាតិសរសៃនេះបន្ថែមបរិមាណយ៉ាងច្រើនដល់អាហារ និងជួយធ្វើអោយពោះវៀនមានចលនារលូន។ នេះជួយការបន្ទោរបង់អោយបានទៀងទាត់ និងកាត់បន្ថយបញ្ហាក្រពះពោះវៀនដូចជាការហើមពោះ ចុកចង្អោរនិងការទល់លាមកជាដើម។ មិនត្រឹមតែជួយធ្វើឱ្យទំងន់របស់អ្នកថយចុះប៉ុណ្ណោះទេ តែថែមទាំងធ្វើអោយអ្នកមានសុខភាពល្អថែមទៀតផង។
៤. ប្រយោជន៍នៃសារធាតុចិញ្ចឹមផ្សេងៗ
វីតាមីនឬសារធាតុចិញ្ចឹមមួយចំនួនធំក្នុងរុក្ខជាតិនេះមានមុខងារជាច្រើនក្នុងការការពារ និងអភិវឌ្ឍរាងកាយមនុស្ស។ វីតាមីន K និងវីតាមីន B9 ត្រូវបានគេទទួលស្គាល់ថាអាចការពារជំងឺពុកឆ្អឹង និងធ្វើអោយឆ្អឹងកាន់តែរឹងមាំ។ វីតាមីន C ជួយដល់ការលូតលាស់និងកើតឡើងវិញនៃកោសិកាស្បែក និងកូឡាជែនដែលជួយឱ្យស្បែកមើលទៅរលោងក្មេងជាងវ័យ និងមានសុខភាពល្អ។ សារធាតុចិញ្ចឹមរបស់ពោតបារាំងដូចជាវីតាមីន C និង A គឺអាចការកាត់បន្ថយហានិភ័យនៃជំងឺភ្នែកឡើងបាយ និងការចុះខ្សោយនៃភ្នែក។
៥. ទប់ស្កាត់ជំងឺមហារីក
វាផ្ទុកទៅដោយអង់ទីអុកស៊ីដង់ដែលផ្តល់ជំនួយទៅដល់កោសិកាក្នុងការប្រយុទ្ធប្រឆាំងនឹងរ៉ាឌីកាល់សេរី ដែលអាចនាំឱ្យមានជំងឺមហារីក។
៦. ជួយដល់ប្រព័ន្ធភាពស៊ាំ
វាមានផ្ទុកជាតិសរសៃដែលមានចិញ្ចឹមបាក់តេរីល្អៗ ដែលត្រូវការនៅក្នុងពោះវៀនដែលបង្កើតភាពស៊ាំរបស់យើងប្រឆាំងនឹងវីរុស និងការឆ្លងបាក់តេរីផ្សេងៗ។
៧. ជំរុញអោយម្តាយ និងទារកមានសុខភាពល្អ
វីតាមីនគឺជាសារធាតុចិញ្ចឹមដ៏សំខាន់សម្រាប់ស្ត្រីមានផ្ទៃពោះ ដែលសារធាតុនេះជួយបន្ថយហានិភ័យនៃការខូចបំពង់សរសៃប្រសាទដែលប៉ះពាល់ដល់ខួរក្បាលនិងឆ្អឹងខ្នងរបស់ទារកដែលកំពុងវិវត្ត។ ដូចនេះការបរិភោគពោតបារាំងអំឡុងពេលមានផ្ទៃពោះគឺល្អចំពោះម្តាយផងនិងទារកក្នុងផ្ទៃផង៕