លោក សុខ ជំនោរ៖ «បច្ចុប្បន្ន បទ​​សរសេរ​​​ខុស ប្រើ​​ភាសា​​​និយាយ​​​មក​​​សរ​សេរ​ ​តើ​អ្នក​ណា​អ្នក​​ចេញ​​មុខ​​​ទទួល​ខុស​ត្រូវ?​» ​

កវីនិពន្ធទំនុកច្រៀងដ៏ល្បីឈ្មោះលោក សុខ ជំនោរ នៅតែកំពុងបម្រើអារម្មណ៍អ្នកគាំទ្ររបស់លោកលើវិស័យសិល្បៈ​ជា​ច្រើន​​ទម្រង់ ជាពិសេសគឺវិស័យចម្រៀងតែម្តង។

មហាជនច្បាស់ជានៅចាំបានយ៉ាងច្បាស់ពីស្នាដៃរបស់លោក សុខ ជំនោរ នៅក្នុងផលិតកម្មរស្មីហង្សមាស ដែល​ទទួល​បាន​ការគាំទ្រយ៉ាងខ្លាំងនៅក្នុងអាលប៊ុមចម្រៀងភាពយន្ត “ដើម្បីស្នេហ៍” ស្ថិតក្រោមការបកស្រាយពីតារា​ចម្រៀង ៣ដួង គឺលោក ឆន សុវណ្ណារាជ លោក ណុប បាយ៉ារិទ្ធ និងអ្នកនាង សុគន្ធ និសា។

យ៉ាងណាមិញកាលពីពេលថ្មីៗនេះលោក សុខ ជំនោរ ទើបនឹងបានបង្ហោះនូវសារដ៏មានអត្ថន័យមួយដែលបង្ហាញ​ពី​ដំណើរ​​ការនៃការចេញ​លក់នូវអាលប៊ុមចម្រៀងនីមួយៗកាលពីប៉ុន្មានឆ្នាំមុន ដែលតម្រូវឱ្យមានលក្ខខណ្ឌដាច់ខាតមួយ​ដែល​មានខ្លឹមសារថា៖
“អ្នកស្តាប់ចម្រៀងបច្ចុប្បន្នប្រហែលមិនស្គាល់ទិដ្ឋាការនេះទេ ព្រោះសម័យឥលូវដោយគេលែង​ផលិតថាស VCD ទើបគេលែងខ្វល់នឹងឆ្លងសុំទិដ្ឋាការពីក្រសួងវប្បធម៌។ ជំនាន់ទិដ្ឋាការនៅមានប្រសិទ្ធភាព គឺបើ MV ណាមាន​រូបភាព​មិនល្អ ឬ ខុសអក្ខរាវិរុទ្ធ គឺក្រសួងមិនចេញទិដ្ឋាការឱ្យទេ។ ចុះបច្ចុប្បន្ន? បទសរសេរខុស ប្រើពាក្យ​មិនត្រូវ ប្រើភាសា​និយាយ​មកសរសេរ គ្មានមូលដ្ឋាន តើអ្នកណាអ្នកចេញ​មុខ​ទទួលខុសត្រូវ? អ្នកនិពន្ធត្រូវចេះ​អ្វីខ្លះ?”៕

សូមទស្សនារូបភាពខាងក្រោមនេះ៖