រាជធានីភ្នំពេញ ៖ រ៉ឺម៉កម៉ូតូចេញពីហាងផឹកស៊ីបើកផ្លូវបញ្ច្រាសបុកគ្នាជាមួយម៉ូតូ ឌ្រីមសេ១២៥ ស៊េរី២០០៨ ពណ៌ខ្មៅ បណ្ដាលឱ្យរងរបួសស្រាល៣នាក់ ឯម៉ូតូឌ្រីមសេ១២៥ បាក់ខ្នងខាងមុខ។ ក្រោយពេលកើតហេតុភាគីទាំងពីរ ដោះស្រាយដោយខ្លួនឯងរហូតបែកពពុះមាត់អស់២ម៉ោងនៅតែមិនត្រូវគ្នា ទើបទូរស័ព្ទហៅប៉ូលិសទៅជួយអន្ដរាគមន៍ហើយត្រូវតំណាងភាគីទាំង សងខាងដែលទៅជួយដោះស្រាយសុទ្ធតែស្រវឹងជោកជាំនោះបាននិយាយមើលងាយ មើលថោកដល់សមត្ថកិច្ច ព្រមទាំងប្រុងវាយសមត្ថកិច្ចទៀតផង។ ហេតុការណ៍នេះកើតឡើងនៅមុខភោជនីយដ្ឋាន១៦៨ តាមផ្លូវជាតិលេខ២ ក្រុម៨ ភូមិព្រែកតានូ សង្កាត់ចាក់អង្រែលើ ខណ្ឌមានជ័យ កាលពីវេលាម៉ោង១២រំលងអធ្រាត្រឈានចូលថ្ងៃទី៨ មេសា ។
ប្រភពព័ត៌មានពីកន្លែងកើតហេតុបានឱ្យដឹងថា រ៉ឺម៉កម៉ូតូដឹកមនុស្សស្រី៣នាក់ ចេញពីហាងផឹកស៊ី បើកតាមផ្លូវបញ្ច្រាស ពីជើងទៅត្បូង។ចំណែកម៉ូតូឌ្រីមសេ១២៥ ស៊េរី២០០៨ ពណ៌ខ្មៅ ជិះគ្នា២នាក់ ជាយុវជនបើកពីត្បូងទៅជើងបញ្ច្រាសទិសគ្នា ខណៈមកដល់ចំណុចកើតហេតុបានបុកគ្នាផាំងប្រាវធ្វើឱ្យម៉ូតូឌ្រីមសេ ១២៥ បាក់ខ្នងខាងមុខ និងរបួសស្រាលទាំង២នាក់ព្រមទាំងស្ដ្រីម្នាក់ជិះក្នុងរ៉ឺម៉កម៉ូតូ របួសពកក្បាល។
អ្នកបើករ៉ឺម៉កម៉ូតូមានឈ្មោះហូន សុធា ភេទប្រុស អាយុ៣៣ឆ្នាំ ជាអ្នករត់រ៉ឺម៉កម៉ូតូ ស្នាក់នៅភូមិត្នោតជ្រុំ សង្កាត់បឹងទំពុន ខណ្ឌមានជ័យ និងអ្នកជិះក្នុងរ៉ឺម៉កម៉ូតូម្នាក់ឈ្មោះលុច ស្រីពេជ្រ ភេទស្រី អាយុ៣៣ឆ្នាំ របួសពកក្បាល ។ ចំណែកអ្នកបើកម៉ូតូឌ្រីមសេ១២៥ ឈ្មោះ យ៉ែម សារ៉ាត់ ភេទប្រុស អាយុ២០ឆ្នាំ ស្នាក់នៅភូមិ៩ សង្កាត់ទន្លេបាសាក់ ខណ្ឌចំការមន និងម្នាក់ទៀតជិះពីក្រោយឈ្មោះង៉ែត ចរិយា ភេទប្រុស អាយុ២២ឆ្នាំ របួសស្រាលទាំងពីរនាក់ ៕
បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
