អង់គ្លេស៖ លោក Peter Crouch ដែលជាអតីតកីឡាកររបស់ Liverpool បានផ្ដល់ដំណោះស្រាយខ្លះៗដល់ភាគីលោកគ្រូបង្វឹក Jurgen Klopp ថា ខ្សែការពារ Dayot Upamecano របស់ក្លិបអាល្លឺម៉ង់ RB Leipzig អាចដោះស្រាយបញ្ហាកង្វះខ្សែការពាររបស់ក្លិបបាន និងថែមទាំងកោតសរសើរខ្សែការពាររូបនេះទៀតថាជាកីឡាករល្អបំផុតមួយរូបនៅអឺរ៉ុបផងដែរ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
បច្ចុប្បន្ននេះ តំបន់ការពាររបស់ក្លិបហង្សក្រហម Liverpool កំពុងខ្សោយទៅៗដោយសារតែកង្វះតួឯក Virgil van Dijk និង Joe Gomez ដែលកំពុងសម្រាកព្យាបាលរបួសដោយមិនកំណត់រយៈពេល ខណៈ Liverpool ធ្លាក់មកឈរនៅលេខរៀងទី៥ ក្នុងតារាង Premier League និងរកឈ្នះមិនឃើញទេក្នុងការប្រកួតចំនួន៥ចុងក្រោយនេះ ឯ កីឡាករដែលធ្លាប់លេងតំណែងខ្សែបម្រើដូចជា Fabinho និង ប្រធានក្រុម Jordan Henderson ត្រូវមកលេងជាខ្សែការពារវិញ។
ដោយហេតុនេះហើយទើប Liverpool អាចនឹងខកខានឱកាសបានឡើងទៅវគ្គបន្ទាប់នៃប្រកួតធំ Champions League បើសិននៅតែរក្សាទម្រង់លេងបែបនេះ ធ្វើឲ្យលោក Peter Crouch គិតថាខ្សែការពារ Dayot Upamecano ជាជម្រើសដ៏សក្តិសមសម្រាប់យកមកពង្រឹងតំបន់ការពាររបស់ Liverpool ដោយលោកបានប្រាប់ TalkSPORT ថា៖
អ្នកគ្រប់គ្នាក្នុងពិភពបាល់ទាត់សុទ្ធតែមើលឃើញថាពួកគេ(Liverpool)ត្រូវការខ្សែការពារណាស់ អ្នកតែងគិតថាពួកគេនឹងទិញយកនរណាម្នាក់មុនពេលទីផ្សារដោះដូរកីឡាករបិទទ្វារ។ប៉ុន្តែពួកយើងមិនអាចរិះគន់លើច្បាប់នៃការទិញដូរកីឡាកររបស់ Liverpool បាននោះឡើយ វាពិតជាមិនគួរឲ្យជឿមែនថាកីឡាករដែលពួកគេទិញយកមកគឺសុទ្ធតែល្អៗត្រូវចិត្តណាស់និងធ្វើបានល្អកាន់តែខ្លាំងឡើងជារឿយៗ។ បើសិនម្នាក់នោះមិនមែនជាកីឡាករដែលលេងត្រូវនឹងស្ទាយ៍ពួកគេទេនោះពួកគេមិនទិញយកឡើយ ខណៈដែលមានខ្សែការពារច្រើនណាស់ដែលគួរឲ្យចាប់អារម្មណ៍ប៉ុន្តែខ្ញុំគិតថា Upamecano ជាខ្សែការពារលំដាប់កំពូលមួយរូប ខ្ញុំគិតថាគេជាកីឡាករដែលល្អបំផុតនៅអឺរ៉ុប គេនឹងក្លាយជាកីឡាករដែលល្អម្នាក់បើសិនអ្នកចេះប្រើប្រាស់គេ។
Liverpool នឹងត្រឡប់មកចូលលេងក្នុងក្របខណ្ឌ Premier League វិញដោយប៉ះជាមួយ Spurs នៅថ្ងៃព្រហស្បតិ៍ឈានចូលថ្ងៃសុក្រម៉ោង៣ទាបភ្លឺ(ម៉ោងនៅកម្ពុជា)នេះហើយក្រោយត្រូវក្លិបគូប្រជែង Manchester United ទម្លាក់ចេញពីពាន FA Cup ដោយលទ្ធផល ៣ ទល់នឹង ២៕
ប្រភព៖ goal
Bong I.T