ប្រកាច់ស្លាប់ភ្លាមៗ ​ពេលកំពុងព្យួរសេរ៉ូម

ខេត្តកំពង់ស្ពឺ ៖ បុរសរងគ្រោះម្នាក់ឈ្មោះណឹប ចាន់ណន អាយុ៥២ឆ្នាំ រស់នៅភូមិដក់ពរ សង្កាត់ស្វាយក្រវ៉ាន់ ក្រុងច្បារមន បានស្លាប់ភ្លាមៗនៅនឹងកន្លែង កំពុងព្យួរសេរ៉ូមនៅផ្ទះរបស់គាត់ ។

ហេតុការណ៍នេះកើតឡើងនៅម៉ោង ៥និង២០នាទីល្ងាចថ្ងៃទី៣០ ឧសភា ២០១៣ ក្រោយពេលគាត់មក ពីលាងឡានវិញ មានអាការអស់កម្លាំង ក៏ហៅគ្រូពេទ្យឯកជនភូមិឱ្យមកដាក់សេរ៉ូម ។ ក្រោយមកបានបន្តិចក៏សន្ធំ ខ្សោយទៅៗដាច់ខ្យល់ស្លាប់តែម្តង ។

នៅវេលាព្រឹកថ្ងៃទី៣១ ឧសភា ២០១៣ អាជ្ញាធរមានសមត្ថកិច្ចរួមមាន ព្រះរាជអាជ្ញា វេជ្ជបណ្ឌិតកោសល្យ វិច័យមន្ទីរពេទ្យបង្អែកខេត្ត និងប៉ូលិសព្រហ្មទណ្ឌបច្ចេកទេស បានមកត្រួតពិនិត្យចេញសេចក្តីសន្និដ្ឋានថា នេះជាប្រតិកម្មថ្នាំ ទើបបណ្តាលឱ្យជនរងគ្រោះស្លាប់ ក៏ឈានដល់ការចាប់ឃាត់ខ្លួន គ្រូពេទ្យឯកជនឈ្មោះស៊ុម និ អាយុ៥៤ឆ្នាំ នៅភូមិជាមួយជនរងគ្រោះ ដើម្បីចាត់ការតាមផ្លូវច្បាប់ ៕

បញ្ចូលអត្ថបទ ៖ បុប្ផា កោះ

 ផ្តល់សិទ្ធដោយ កោះសន្តិភាព