បងប្អូនត្រកូល Manchester ទាំងពីរ កំពុងប្រជែងគ្នាតាមទិញជម្រើសជាតិប្រេស៊ីលម្នាក់រហ្សសនាម Neymar ទី២

អង់គ្លេស៖ ក្លិបបិសាចក្រហម Manchester United និងក្រុមគូប្រជែងរួមទឹកដីគឺ Manchester City នឹងដណ្ដើមគ្នាទិញយក ខ្សែប្រយុទ្ធ Gabriel Veron ដែលត្រូវអ្នកគាំទ្រកីឡាបាល់ទាត់ដាក់ឈ្មោះគេថាជា Neymar ទី២ក្រោយរូបគេបានបង្ហាញទម្រង់លេងដ៏លេចធ្លោនៅក្លិប Palmeiras។

Veron ទើបតែមានអាយុ១៨ឆ្នាំទេហើយពេលនេះដែរគេត្រូវក្លិបធំៗនៅអឺរ៉ុបចង់បានបណ្ដើរៗហើយដែលក្នុងនោះមានក្លិប បិសាចក្រហម Manchester United និងក្លិបមេឃខៀវ Manchester City ប៉ុន្តែក្លិបទាំងពីរនេះកំពុងទាក់ទងចរចាយក Veron បែបស្ងាត់ៗដោយមិនបើកចំហរអ្វីច្រើននោះឡើយ។

ការពិតទៅកន្លងមក Gabriel Veron ត្រូវបានក្លិបយក្សនៅតំបន់កាតាឡាន់ FC Barcelona សម្លឹងចង់ទិញគេយកមកទឹកដីកីឡដ្ឋាន Camp Nou ប៉ុន្តែដោយសារពេលនេះក្លិបកំពុងប្រឈមនឹងវិបត្តិហិរញ្ញវត្ថុធ្ងន់ធ្ងរពេកទើបមិនអាចចាយប្រាក់ទិញយកកីឡាករថ្មីៗណាមួយមកបាន ហើយម្យ៉ាងទៀតការបោះឆ្នោតប្រធានក្លិបថ្មីក៏ត្រូវពន្យារពេលអមជាមួយបញ្ហាស្មុគស្មាញជាច្រើនទៀតដែលនោះបានផ្ដល់ឱកាសមាសដល់គូប្រជែង Manchester ទាំងពីរក្នុងការបញ្ចុះបញ្ចូល Veron ។

ខ្សែប្រយុទ្ធសញ្ជាតិប្រេស៊ីលម្នាក់នេះរកបាន៨គ្រាប់និងបញ្ជូនបាល់ឲ្យមិត្តរួមក្រុមចំនួន៣ ក្នុងការបង្ហាញខ្លួនសរុប៣៣លើកតាំងពីបានចូលលេងឲ្យ Palmeiras មក និងថែមទាំងបានបង្ហាញខ្លួនឲ្យក្រុមជម្រើសជាតិក្រោម១៦ ដល់២០ឆ្នាំរបស់ប្រេស៊ីលទៀតផងដោយ Veron បានឈ្នះពាន Golden Ball Award នៅក្នុងព្រឹត្តិការណ៍បាល់ទាត់ពិភពលោកសម្រាប់កីឡាករក្រោម១៧ឆ្នាំដែលធ្វើឡើងនៅប្រទេសកំណើតរបស់គេថែមទៀត។

កុងត្រារបស់ Veron ជាមួយក្លិប Palmeiras នឹងមានសុពុលភាពរហូតដល់ឆ្នាំ២០២៥ ឯណោះ ហើយតម្លៃផ្ដាច់កុងត្រារបស់គេគឺមានដល់ទៅ ៥៣លានផោន(ស្មើនឹងប្រមាណ ៦០លានដុល្លារ) ប៉ុន្តែ Palmeiras អាចនឹងអនុញ្ញាតឲ្យមានការចរចា តថ្លៃមកត្រឹមប្រមាណ ២០លានផោន(ស្មើនឹងប្រមាណ២៧.៤លានដុល្លារ) ដែលតម្លៃនេះ គឺក្លិប Manchester ទាំងពីរអាចមានសមត្ថភាពចំណាយបាន៕

ប្រភព៖ dailymail