គ្រាន់តែគេងក៏បានលុយ! គេហទំព័រមួយប្រកាសជ្រើសរើស “ស្តេចគេង” ឱ្យមកសាកល្បងគុណភាពពូកជាថ្នូរនឹងទឹកប្រាក់ ៣,០០០ដុល្លារ

អាមេរិក៖ គេហទំព័រមួយដែលមានឈ្មោះថា SleepJunkie បានប្រកាសជ្រើសរើស “ស្តេចគេង” ឱ្យមកសាកល្បងគុណភាពពូកជាថ្នូរនឹងទឹកប្រាក់ ៣,០០០ដុល្លារ នៅសហរដ្ឋអាមេរិក។

គេហទំព័រនេះបានគូសបញ្ជាក់ពីលក្ខខណ្ឌមួយចំនួនសម្រាប់បេក្ខជន ដែលមានបំណងដាក់ពាក្យចូលរួមរួមមាន៖ ត្រូវគេងនៅលើពូកចំនួន ៣ ជ្រើសរើសដោយក្រុមហ៊ុនសម្រាប់រយៈពេល ២ ខែ ហើយបន្ទាប់ពីនោះត្រូវសរសេររៀបរាប់យ៉ាងលម្អិតពីបទពិសោធន៍នៃការគេងរបស់ខ្លួននៅលើពូកទាំងនោះ។ ក្នុងនោះដើម្បីស័ក្តិសមទៅនឹងតួនាទីដែលបានជ្រើសរើស បេក្ខជនទាំងនោះត្រូវចាប់ផ្តើមដោយខ្លួនឯង ដោយអាចធ្វើការគេងបានភ្លាមៗនិងដោយឯករាជ្យ ព្រមទាំងមានជំនាញសរសេរច្បាស់ ជំនាញវាយតម្លៃល្អ និងពូកែគេងផងដែរ។

បន្ទាប់ពីចប់ការធ្វើតេស្តនេះ បេក្ខជនទាំងនោះនឹងទទួលបានទឹកប្រាក់សរុបចំនួន $៣,០០០ និងមានសិទ្ធជ្រើសរើសពូក ១ យកទៅផ្ទះដោយឥតគិតថ្លៃ ប៉ុន្តែពួកគេត្រូវគោរពតាមលក្ខខណ្ឌខាងលើ និងត្រូវធានាថាខ្លួនអាចគេងម្នាក់ឯងបានដោយមិនមានការរំខាន៕