អង់គ្លេស៖ កាលពីយប់ថ្ងៃអង្គារឈានចូលថ្ងៃពុធទី២៧ ក្លិបកាំភ្លើងធំ Arsenal បានធ្វើដំណើរទៅទឹកដីកីឡដ្ឋាន St.Mary ដើម្បីជួបជាមួយម្ចាស់ផ្ទះ Southampton ដែលជាការប្រកួតក្នុងក្របខណ្ឌ Premier League ដោយក្នុងនោះ Arsenal បានយកឈ្នះ Southampton ៣ ទល់នឹង ១ ធ្វើឲ្យលោកគ្រូបង្វឹក Mikel Arteta ញញឹមរីកមុខរីកមាត់បើទោះបីជាភាគីខាងក្រុមម្ចាស់ផ្ទះជាអ្នករកបើកឆាករកគ្រាប់បាល់កាត់មុខដោយ Stuart Armstrong នៅនាទីទី៣ក៏ដោយ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
គ្រាប់បាល់ទាំង៣របស់ Arsenal រួមចំណែកស៊ុតដោយខ្សែប្រយុទ្ធ Nicolas Pepe នៅនាទីទី៨ ,ខ្សែបម្រើវ័យក្មេងកំពុងឡើងជើង Bukayo Saka នៅនាទីទី៣៩ និងខ្សែប្រយុទ្ធ Alexandre Lacazette នៅតង់ទី២ នាទីទី៧២ដែលបានជួយឲ្យ Arsenal បន្តក្ដីសង្ឃឹមក្នុងការស្រវាយកពាន Premier League ។
ជោគជ័យនេះបានធ្វើឲ្យ Arsenal ឈ្នះ៥ប្រកួត ក្នុង៦ប្រកួតចុងក្រោយរបស់ពួកគេក្នុងក្របខណ្ឌ Premier League ដែលជាលទ្ធផលមួយមិនអាក្រក់នោះឡើយ ហើយពេលនេះក្លិបកំពុងឈរនៅលេខរៀងទី៨ក្នុងតារាង Premier League ។
បន្ទាប់ពីអាជ្ញាកណ្ដាលផ្លុំកញ្ចែបញ្ចប់ការប្រកួតជាផ្លូវ លោកគ្រូបង្វឹក Mikel Areteta បានថ្លែងប្រាប់ BT Sport ដោយសរសើរខ្សែប្រយុទ្ធ Nicolas Pepe ថា៖
គេ(Nicolas Pepe) បានបង្ហាញទម្រង់លេងល្អម្ដងទៀតហើយ គេជាអ្នកចូលរួមជួយបង្កើតឱកាសធ្វើឲ្យពួកយើងឈ្នះហើយគេសមគួរនឹងទទួលបានឱកាសចូលលេងក្នុងថ្ងៃនេះណាស់។
ហើយពេលអ្នកកាសែតសួរដល់ខ្សែបម្រើវ័យក្មេង Bukayo Saka លោកគ្រូបង្វឹកសញ្ជាតិអេស្ប៉ាញរូបនេះបានសរសើរគេថា៖
គេ(Bukayo Saka)នៅតែរក្សាទម្រង់លេងបានល្អនិងនៅតែមាំមួន គេធ្លាប់ចូលលេងក្នុងតំណែងចម្រុះ ប៉ុន្តែគេអាចសម្របខ្លួននឹងការប្រកួតបាន គេពិតជាកីឡាករដែលពូកែខាងបញ្ជូនបាល់ឲ្យមិត្តរួមក្រុម។ ថ្ងៃនេះគេពិតជាលេងបានល្អណាស់។
គួររម្លឹកផងដែរថាក្នុងការប្រកួតនេះដែរ ខ្សែបម្រើ Emile Smith Rowe ដែលទទួលបានការសរសើរពីសំណាក់លោកគ្រូបង្វឹកនិងអ្នកគាំទ្របានចូលលេងដែរតែគេបានរងរបួសទើបត្រូវបញ្ជូនចេញពីទីលានចំណែកខ្សែការពារសញ្ជាតិស្កុដឡែន៍ Kieran Tierney ដែលត្រូវ Sir Alex Ferguson សរសើរមិនដាច់ពីមាត់ក៏អវត្តមានដែរដោយសារមិនទាន់ជាសះស្បើយ៕
សូមទស្សនាវីដេអូនៃការប្រកួតខាងក្រោមនេះ៖
ប្រភព៖ mirror
Bong I.T