រូបភាពប៉ុន្មានសន្លឹកនេះបញ្ជាក់ពីអារម្មណ៍កីឡាករ Chelsea ពេលលោកគ្រូ Tuchel ចូលមកបង្ហាញខ្លួនដំបូង

អង់គ្លេស៖ នៅយប់ថ្ងៃទី២៧ខែមករាកន្លងទៅនេះ ក្លិបតោខៀវ Chelsea បានប្រកាសតែងតាំងលោកគ្រូបង្វឹក Thomas Tuchel ជាផ្លូវការបន្ទាប់ពីបញ្ចប់តំណែងលោកគ្រូបង្វឹក Frank Lampard ហើយនៅថ្ងៃនេះ លោកគ្រូបង្វឹកសញ្ជាតិអាល្លឺម៉ង់ដែលជាអតីតគ្រូបង្វឹករបស់ក្លិប Borussia Dortmund និង Paris Saint-Germain ម្នាក់នេះបានមកចូលរួមធ្វើការណែនាំខ្លួនដល់កីឡាករក្រោមឱវាទ ព្រមទាំងសង្កេតមើលកីឡាករ Chelsea កំពុងហ្វឹកហាត់នៅទីលាន Cobham ដើម្បីត្រៀមចូលប្រកួតប៉ះនឹងក្លិប Wolves នៅថ្ងៃស្អែក ទី២៨ វេលាម៉ោង ១ទាបភ្លឺ ដែលជាការប្រកួតក្នុងក្របខណ្ឌ Premier League ក្នុងទឹកដី Stamford Bridge ផងដែរ។

ការប្រកាសតែងតាំងលោកគ្រូ Tuchel ជាគ្រូបង្វឹកថ្មីរបស់ Chelsea គឺធ្វើឡើងលឿនខ្លាំងណាស់ទើបគេមិនរំពឹងទុកទេថាទាំងកីឡាករនិងគ្រូបង្វឹកថ្មីនេះអាចចុះសម្រុងនឹងគ្នាបានដែរឬអត់ ប៉ុន្តែបើមើលតាមរូបភាពដែលថតបានកំឡុងពេលហ្វឹកហាត់គឺបញ្ជាក់ថាកីឡាករក្លិប Chelsea ហាក់បីដូចជាគ្មានបញ្ហានឹងរឿងនេះឡើយ។

កីឡាករដែលធ្លាប់ស្ថិតក្រោមការដឹកនាំរបស់លោកគ្រូកាលពីក្លិបចាស់ដូចជា ខ្សែបម្រើ  Christian Pulisic និង ខ្សែការពារ Thiago Silva ត្រូវបានគេឃើញថាបានចូលហ្វឹកហាត់ដោយទឹកមុខត្រង់ស្មើ ហើយទោះពួកគេមិនទាន់មានស្នាមញញឹម មិនសើចសប្បាយ ក៏មិនបានបង្ហាញកាយវិការច្រងេងច្រងាងណាមួយគឺហ្វឹកហាត់តាមធម្មតាខណៈលោកគ្រូបង្វឹក Thomas Tuchel បានឈរសង្កេតមើលនិងចង្អុលដៃប្រាប់កីឡាករពីសកម្មភាពនិងតិកនិកផ្សេងៗ។

គួររម្លឹកផងដែរថា លោកគ្រូ Tuchel ចុះកិច្ចព្រមព្រៀងរយៈពេល១៨ខែជាមួយក្លិប Chelsea ព្រមជាមួយលក្ខខណ្ឌអាចបន្តកុងត្រាទៀតបាន ហើយលោកគ្រូបង្វឹករូបនេះក៏បានបង្ហើបពីអារម្មណ៍ពិតដែរថាលោកសប្បាយចិត្តណាស់ដែលបានធ្វើជាផ្នែកមួយនៃក្លិបថែមទាំងមិនភ្លេចលើកឡើងដល់សមិទ្ធផលដែលអតីតលោកគ្រូបង្វឹក Lampard បានខិតខំកសាងនៅក្លិបផងដែរ។

Chelsea បានប្រកាសជាផ្លូវការហើយថាការប្រកួតដំបូងដែលលោកគ្រូបង្វឹក Tuchel ដឹកនាំដំបូងឲ្យ Chelsea គឺការប្រកួតទល់នឹង Wolves ស្របពេលក្លិបកំពុងឈរនៅលេខរៀងទី១០ក្នុងតារាង Premier League ដោយមាន២៩ពិន្ទុក្នុងដៃ៕

ទស្សនាបណ្ដុំរូបភាពលោកគ្រូបង្វឹក Thomas Tuchel  ចូលបង្ហាញខ្លួនក្នុងការហ្វឹកហាត់លើកដំបូងឱ្យ Chelsea៖

ប្រភព៖ metro