គាត់ទាមទារច្រើនពេក!មកដឹងមូលហេតុពិតដែល Chelsea បណ្ដេញលោកគ្រូ Lampard ចេញ

អង់គ្លេស៖ នៅថ្ងៃទី២៥ម្សិលមិញនេះ ក្លិបតោខៀវ Chelsea បានប្រកាសបញ្ចប់តំណែងរបស់លោកគ្រូបង្វឹក Frank Lampard បន្ទាប់ពីលោកគ្រូដឹកនាំបាន១៨ខែពេញ ប៉ុន្តែប្រិយមិត្តមានចម្ងល់ទេថាហេតុអីសុខៗ លោកប្រធានក្លិប Roman Abramovich បែរជាសម្រេចចិត្តបែបនេះទៅវិញ?

កាលលោកគ្រូ Lampard ឡើងមកកាន់តំណែងជាគ្រូបង្វឹកដំបូងក្នុងឆ្នាំ២០១៩ គឺ Chelsea កំពុងជាប់បម្រាមហាមមិនឲ្យទិញកីឡាករដាច់ខាត ប៉ុន្តែលោកគ្រូក៏អាចដឹកនាំឲ្យក្លិបមួយនេះឈរនៅលេខរៀងទី៤ក្នុងតារាង Premier League ដែកចាត់ទុកថាជាភាពជោគជ័យមួយ។

បន្ទាប់មកលោកគ្រូបង្វឹកសញ្ជាតិអង់គ្លេសរូបនេះបានស្នើឲ្យក្លិបចុះកិច្ចព្រមព្រៀងទិញយកកីឡាករ៣រូបគឺ Kai Havertz, Timo Werner និង Ben ChilWell ដោយចំណាយលុយដល់ទៅ ២២៥លានផោន(ស្មើនឹងប្រមាណ៣០៦.៤លានដុល្លារ)ឯណោះប៉ុន្តែមកទល់ពេលនេះហើយគឺកីឡាករអស់ទាំងនោះមិនទាន់បានបង្ហាញទម្រង់លេងលេចធ្លោគួរឲ្យកត់សម្គាល់នោះទេ។

ប៉ុន្តែអ្វីដែលធ្វើឲ្យថ្នាក់ដឹកនាំរបស់ Chelsea ខឹងសម្បារនោះគឺមកពីលោកគ្រូបានទាមទារម្ដងហើយម្ដងទៀតថាចង់ទិញយកខ្សែបម្រើ Declan Rice ពីក្លិបគូប្រជែង West Ham ទៀតផងខណៈដែលខ្សែបម្រើរូបនេះ ធ្លាប់លេងនៅ Chelsea តាំងពីកុមារតែត្រូវក្លិបដោះលែងឲ្យចាកចេញពេលអាយុបាន១៥ឆ្នាំ។

West Ham មិនចង់លក់ Rice នោះឡើយតែដោយសារកីឡាករម្នាក់នេះចង់ចាកចេញ ទើបក្លិបលក់គេក្នុងតម្លៃ៨០លានផោន(ស្មើនឹងប្រមាណ១០៨.៩លានដុល្លារ)កាលពីរដូវក្ដៅមុន ធ្វើឲ្យលោកគ្រូ Lampard ចង់យកគេមកចូលរួមនៅទឹកដី Stamford Bridge ម្ដងទៀត។

យោងតាមសារព័ត៌មាន The Athletic បានបង្ហើបថាថ្នាក់ដឹកនាំរបស់ Chelsea មានការមិនពេញចិត្តនិងមិនគិតថា Rice អាចជួយក្លិបពួកគេបាននោះឡើយហើយពួកគេគិតថា កីឡាករលេងតំណែងខ្សែបម្រើការពារដូច Declan Rice មានច្រើនក្នុងស្ដុកស្រាប់និងគួរយកលុយនោះទៅទិញកីឡាករតំណែងផ្សេងទៀត។

ដោយសារ លោកគ្រូ Frank Lampard នៅតែទទូចសុំផ្ទេរយក Declan Rice ម្ដងហើយម្ដងទៀតទើបគណៈកម្មការផ្នែកវិនិច្ឆ័យការទិញយកកីឡាករ បានបដិសេធមិនទិញយក Rice ដែលបណ្ដាលឲ្យមានភាពល្អក់កករបែបនេះ។

មិនត្រឹមតែប៉ុណ្ណឹងទេ លោកគ្រូ Lampard មានការខ្វែងគំនិតគ្នាដោយថ្នាក់ដឹកនាំក្លិបចង់លក់ Antonio Rudiger, Marcos Alonso និងEmerson តែលោកគ្រូ Lampard មិនយល់ព្រម។

ថ្នាក់ដឹកនាំរបស់ Chelsea ក៏បានចុះកិច្ចព្រមព្រៀងផ្ទេរយកខ្សែការពារ Thiago Silva មកទឹកដីStamford Bridge ផងដែរខណៈលោកគ្រូ Lampard មិនបានផ្ដួចផ្ដើមគំនិតនេះទេប៉ុន្តែភាពល្អក់កករចិត្តរវាងភាគីទាំងពីរបានផ្ទុះឡើងកាន់តែខ្លាំងពេលលោកគ្រូស្នើសុំឲ្យទិញ Declan Rice ពេលទីផ្សារដោះដូរកីឡាករខ្សែមករានេះបើកទ្វារទើបធ្វើឲ្យលោកប្រធានក្លិប Roman Abramovich អស់ទំនុកចិត្តនិងប្រកាសបញ្ចប់តំណែងលោកគ្រូបែបនេះ៕

ប្រភព៖ metro