ជិះ​ម៉ូតូ​បុក​គូទ​រថ​យន្ត​ ដឹក​ដីចត​ស្ងៀ​ម​ នៅ​ចិញ្ចើម​ផ្លូវ​បាក់​.ក​ស្លាប់​

ខេត្តកណ្តាល ៖ បុរសជនជាតិវៀតណាមម្នាក់ បានបាក់.កស្លាប់ភ្លាមៗនៅនឹងកន្លែង ដោយគ្រោះថ្នាក់ចរាចរណ៍ជិះម៉ូតូបុកគូទ រថយន្តដឹកដីដែលខូចចតស្ងៀម នៅចិញ្ចើមផ្លូវ កាលពីវេលាម៉ោង៦ និង៤០នាទីយប់ ថ្ងៃទី២៩ ឧសភា ២០១៣ តាមបណ្តោយផ្លូវជាតិលេខ១ ចំណុចមុខរោងចក្រក្តារបន្ទះ ស្ថិតក្នុងភូមិស្តៅ ឃុំដីឥដ្ឋ ស្រុកកៀនស្វាយ ខេត្តកណ្តាល ។

ជនរងគ្រោះឈ្មោះយាំង គង់ធី អាយុ២៦ឆ្នាំ រស់នៅភូមិកណ្តាលលើ ឃុំបន្ទាយដែក ស្រុកកៀនស្វាយ ជិះម៉ូតូឌ្រីមសេ១២៥ ពណ៌ខ្មៅ រីឯរថយន្តដឹកដីដែលចត នៅចិញ្ចើមផ្លូវម៉ាកហ៊ីណូកង់១០។ តាមប្រភពបានឱ្យដឹងថា មុនពេលកើតហេតុគេឃើញជនរងគ្រោះ ជិះម៉ូតូបោះពួយយ៉ាងលឿនសំដៅទៅភ្នំពេញ លុះមកដល់ចំណុចខាងលើក៏ បុកទម្លុះស្លាកសញ្ញាសម្គាល់រថយន្តខូច រួចជ្រុលមកបុកគូទរថយន្តបណ្តាល ឱ្យបាក់.កស្លាប់ភ្លាមៗតែម្តង ។

ក្រោយកើតហេតុជនរងគ្រោះត្រូវក្រុមគ្រួសារ យកទៅធ្វើបុណ្យតាមប្រពៃណី ចំណែករថយន្ត និងម៉ូតូត្រូវប៉ូលិសចរាចរយកទៅរក្សាទុក នៅអធិការដ្ឋានរង់ចាំការដោះស្រាយ ៕

បញ្ចូលអត្ថបទ ៖ បុប្ផា កោះ

 ផ្តល់សិទ្ធដោយ កោះសន្តិភាព