មិនដូចការគិតឡើយ! ធូលីឋានព្រះចន្ទបង្កគ្រោះថ្នាក់ដ៏ធ្ងន់ធ្ងរ ដល់មនុស្សលោក

បរទេស៖ មនុស្សភាគច្រើនមានទំនោរគិតថា ធូលីឋានព្រះចន្ទមិនខុសពីដីដែលឃើញមាននៅលើផែនដីនោះទេ ប៉ុន្តែវាផ្ទុយពីការគិតរបស់យើង។ ការពិតទៅ ធូលីឋានព្រះចន្ទមានលក្ខណៈខុសគ្នាឆ្ងាយពីធូលីធម្មតាដែលយើងធ្លាប់បានជួប នៅក្នុងជីវិតប្រចាំថ្ងៃរបស់យើង។ អ្វីដែលធ្វើឲ្យធូលីឋានព្រះចន្ទមានគ្រោះថ្នាក់ខ្លាំងគឺថា អង្គធាតុធូលីនីមួយៗនៅតាមផ្ទៃព្រះចន្ទមានលក្ខណៈមុតស្រួច។ កង្វះខ្យល់នៅលើឋានព្រះចន្ទមានន័យថា ធូលីមិនបានហោះឬប៉ើងទៅណានោះទេ ហើយលក្ខណៈមុតស្រួចរបស់វាមិនបានរេចរិលទៅតាមពេលវេលានោះដែរ ប៉ុន្តែដំណើរផ្ទុយពីនេះតែងតែងកើតមាននៅលើផែនដី។

នៅពេលអវកាសយានិកបានធ្វើដំណើរទៅឋានព្រះចន្ទកំឡុងបេសកកម្មអាប៉ូឡូរបស់អង្គការណាសា ភាពមុតស្រួចរបស់ធូលីឋានព្រះចន្ទបានបង្កជាបញ្ហាយ៉ាងខ្លាំង ស្ថិតនៅក្រោមហេតុផលជាច្រើន។ វាមិនត្រឹមតែមានគ្រោះថ្នាក់នៅពេលដកដង្ហើមចូល បន្ទាប់ពីអវកាសយានិកដោះឈុតសម្លៀកបំពាក់អវកាសចេញ នៅកន្លែងមានសុវត្ថិភាពក្នុងយាននោះទេ ប៉ុន្តែវាថែមទាំងអាចតោងស្អិតជាប់លើសាច់ក្រណាត់និងសម្ភារៈឈុតអវកាសផងដែរ។ អវកាសយានិកម្នាក់ដែលមានឈ្មោះថា Harrison Schmitt ពិតជាមិនអាចឈប់កណ្ដាស់បានទេ ក្រហាយភ្នែក និងមានលក្ខណៈពិបាកដកដង្ហើម បន្ទាប់ពីបានចេញទៅប៉ះធូលីដោយផ្ទាល់នៅក្នុងបេសកកម្មមួយរបស់គាត់។

ការសិក្សាវិទ្យាសាស្ត្របានរកឃើញថា នៅពេលធូលីព្រះចន្ទត្រូវបានគេដកដង្ហើមចូល វាអាចនឹងមានទំនាក់ទំនងជាមួយសារធាតុរាវនៅក្នុងដងខ្លួន ដើម្បីបង្កើតជាអ្វីដែលគេហៅថា hydroxyl radicals។ មិនតែប៉ុណ្ណោះ ការយកពួកវាចេញពីក្នុងខ្លួនគឺមិនងាយស្រួលនោះទេ ហើយប្រសិនបើវាអាចធ្វើឲ្យរហែកសម្លៀកបំពាក់អវកាសបាន សាកស្រមៃទៅមើលវាក៏អាចធ្វើរឿងបែបនេះនៅក្នុងសួតរបស់យើងដែរ។

យ៉ាងណាមិញ ណាសាគ្រោងបញ្ជូនមនុស្សទៅកាន់ឋានព្រះចន្ទសាជាថ្មី នៅឆ្នាំ២០២៤ តាមរយៈកម្មវិធី Artemis ហើយគេនឹងប្រឹងប្រែងធ្វើការ ដើម្បីច្បាស់ថាក្រុមអវកាសយានិកមានសុវត្ថិភាពជាចម្បង៕