អង់គ្លេស៖ Jamie O'Hara ដែលជាអតីតកីឡាកររបស់ Arsenal និង Spurs បានបោះសំណួរមួយទៅកាន់ក្លិបបិសាចក្រហម Manchester United ថាហេតុអីបានជាខ្សែបម្រើសញ្ជាតិព័រទុយកាល់ Bruno Fernandes ធ្វើជាមិនទទួលយកការរិះគន់ទាំងដែលខ្លួនឯងពិតជាបានលេងអន់ក្នុងការប្រកួតទល់នឹងក្លិបហង្សក្រហម Liverpool មែន។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
Bruno ធ្វើបានល្អណាស់តាំងពីផ្ទេរមកចូលរួមជាមួយបិសាចក្រហម ប៉ុន្តែអ្នកគាំទ្រភាគច្រើនសង្កេតឃើញថាឲ្យតែប្រកួតធំៗចូលមកដល់គឺមិនឃើញស្រមោលរបស់ខ្សែបម្រើម្នាក់នេះទាល់តែសោះ។
O'Hara គិតថា Bruno គួរតែពង្រឹងខ្លួនឯងខ្លាំងជាងនេះ មិនមែនជំនាញតែខាងទាត់បាល់ប៉េណាល់ទីនោះឡើយ ខណៈដែលលោក Roy Keane ក៏រិះគន់ដែរថាគេពិតជាមិនបានជួយអ្វីដល់ក្រុមទាល់តែសោះ។
នេះមិនមែនជាលើកដំបូងនោះឡើយដែល កីឡាករវ័យ២៦ឆ្នាំរូបនេះបំបាំងកាយក្នុងការប្រកួតធំៗព្រោះសូម្បីការប្រកួតទល់នឹង Manchester City ក្នុងវគ្គពាក់កណ្ដាលផ្ដាច់ព្រ័ត្រពាន Carabao Cup ក៏គេមិនបានជួយជាផ្លែផ្កាអ្វីដល់ក្រុមនោះឡើយ។
Jamie O'Hara បានមើលឃើញចំណុចខ្វះខាតរបស់ Bruno និងនិយាយថាទោះបីគេស៊ុតបញ្ចូលទីបានដល់ទៅ ២៧គ្រាប់និងបញ្ជូនបាល់បាន១៧គ្រាប់ក្នុងការបង្ហាញខ្លួនសរុប៤៩លើកឲ្យ Manchester United ក៏ដោយក៏គេនៅតែភ្លាត់ធ្វើឲ្យរបូតបាល់នៅពេលការប្រកួតធំៗបែបនេះ។
O'Hara បានផ្ដល់បទសម្ភាសន៍ប្រាប់ TalkSPORT Breakfast ថា៖
Bruno Fernandes ដូចជាអស្ចារ្យណាស់ អ្នករាល់គ្នាបាននិយាយពីរូបគេថាគេជាកីឡាករដ៏អស្ចារ្យសម្រាប់ Man UTD ប៉ុន្តែនៅប៉ុន្មានសប្តាហ៍ចុងក្រោយនេះ នៅពេលខ្ញុំបានមើលការប្រកួតធំៗដូចជា Man UTD ទល់នឹង Liverpool និង Man City គឺគេលេងអន់ណាស់។ ការបោះបាល់របស់គេ វាពិតជាធ្វើឲ្យលោកគ្រូ Ole Gunnar Solskjaer ភ័យប្រហោងពោះដូចដែលគាត់និយាយមែន បើតាមខ្ញុំមើលទៅ គេបោះបាល់ដូចវាគ្រាន់តែជាការកម្សាន្ត។ ពេលដែលខ្ញុំមើលការប្រកួតនោះខ្ញុំគិតថា Bruno Fernandes អើយ អ្នកអាចស៊ុតបាល់ប៉េណាល់ទីបានច្រើនណាស់ ប៉ុន្តែនៅក្នុងការប្រកួតធំៗបែបនេះ អ្នកគួរតែចេញមុខមកបើសិនអ្នកចង់ជួយក្រុមឲ្យឈ្នះពានរង្វាន់។ការពិតទៅគេដូចជាបាត់ខ្លួនឈឹងក្នុងការប្រកួតធំៗបែបនេះ។
ខ្សែបម្រើ Jamie O'Hara បានបន្តទៀតថា៖
ខ្ញុំមិនបាននិយាយថាគេមិនមែនជាកីឡាករដ៏ល្អម្នាក់ទេ ប៉ុន្តែបើសិនអ្នកចង់ឲ្យក្រុមឈ្នះពាន Premier League អ្នកគួរតែលេងឲ្យបានល្អក្នុងការប្រកួតធំៗបែបនោះ។ Fernandes គួរតែធ្វើបានល្អនិងកុំមើលរំលងការបោះបាល់ចេញម្ដងៗ ព្រោះខ្ញុំសង្កេតឃើញថាបាល់ជាប់ជើងគេក្នុងប្លង់អេមណាស់កាលពីម្សិលមិញ តែគេបែរជាជ្រើសរើសទាត់បាល់ចេញទៅវិញ វាពិតជាគួរឲ្យតក់ស្លុតមែន! ខ្ញុំគិតថានោះជាភាពខុសគ្នារវាងគេនិង Kevin De Bruyne ដែលអ្នកក៏ដឹងថាគេ(De Bruyne) តែងតែធ្វើបានល្អក្នុងការប្រកួតធំៗបែបនេះ។
ប្រភព៖ talksport
Bong I.T