អង់គ្លេស៖ ខ្សែបម្រើសញ្ជាតិបារាំង Paul Pogba បានអង្គុយចុះទល់មុខនឹងក្រុមការងាររបស់ Skysport ដើម្បីផ្ដល់បទសម្ភាសន៍ួយចំនួនទាក់ទងនឹងការប្រកួតរវាងក្រុមបិសាចក្រហម Manchester United របស់គេទល់នឹងហង្សក្រហម Liverpool ដែលនឹងត្រូវធ្វើឡើងនៅយប់ថ្ងៃអាទិត្យនេះហើយ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ក្នុងនោះដែរ Pogba ព្រមទទួលស្គាល់ពេញមាត់ថាក្លិបបិសាចក្រហម Manchester United នៅលេងមិនទាន់ដល់កម្រិតក្រុមគូប្រជែង Liverpool នោះឡើយ បើទោះបីជាពេលនេះ Man UTD កំពុងឈរនៅលេខរៀងទី១ក្នុងតារាង Premier League ដោយឈ្នះ Liverpool ៣ ពិន្ទុក៏ដោយ។
ការបោះជំហានដ៏ធំរបស់ Man UTD បានធ្វើឲ្យអ្នកវិភាគបាល់ទាត់និងអ្នកគាំទ្រទាំងអស់គិតថាក្លិបអាចនឹងមានភាគរយខ្ពស់ក្នុងការយកឈ្នះ Liverpool ក្នុងការប្រកួតនេះប៉ុន្តែ Pogba មិនមើលស្រាលគូប្រកួតនោះឡើយ។
Paul Pogba បានថ្លែងប្រាប់ Skysport ថា៖
ការពិតទៅពួកយើងធ្វើបានល្អច្រើនណាស់ ពួកយើងកំពុងវិវត្តន៍ខ្លួនម្ដងបន្តិចៗប៉ុន្តែពួកយើងនៅតែជាក្រុមដែលមានភាពក្មេងខ្ចីបន្តិច។ ពួកយើងមិនអាចនិយាយបានទេថាយើងនៅកម្រិតមួយដូចពួកគេ(Liverpool) ព្រោះពួកគេបានឈ្នះពាន Premier League អ៊ីចឹងហើយទាល់តែយើងបានឈ្នះពាននោះដែរទើបយើងអាចនិយាយថាយើងនៅកម្រិតស្មើ Liverpool បាន។
Pogba បានថ្លែងបន្តទៀតថា៖
បើសិនជាអ្នកចង់ធ្វើជាក្រុមដែលល្អផ្ដាច់គេ ជាដំបូងគឺអ្នកត្រូវតែយកឈ្នះក្រុមល្អផ្ដាច់គេជាមុនសិន ពួកយើងចង់យកឈ្នះ Liverpool ដែលជាម្ចាស់ជើងឯកពាន Premier League ។ពួកយើងដឹងថាពួកគេលេងបានល្អណាស់កំឡុងពេលប៉ុន្មានឆ្នាំចុងក្រោយមកនេះ ពួកយើងដឹងពីគុណភាពនៃការលេងរបស់ពួកគេ និងរបៀបដែលពួកគេរត់លើវាលស្មៅ។ ការប្រកួតនេះនឹងក្លាយជាការប្រកួតដ៏លំបាកលំបិនសម្រាប់ពួកយើង ពួកយើងដឹងថាវានឹងពិបាកណាស់ ប៉ុន្តែពួកយើងត្រូវតែមានសមាធិដើម្បីឡើងមកកាន់ចំណុចកំពូលមួយ។ ខ្ញុំគិតថាបើសិនយើងអាចផ្ដោតសមាធិលើការប្រកួតនេះ នោះយើងនឹងមានឱកាសឈ្នះបើទោះបីជាពេលនេះមានក្រុមច្រើនណាស់ដែលអាចមានភាគរយស្រវាយកពាននោះក៏ដោយ ពួកយើងមិនទាន់ដល់កម្រិតកំពូលទេ ពួកយើងនៅឆ្ងាយណាស់។
ប្រភព៖ skysports
Bong I.T