អង់គ្លេស៖ លោក Jason McAteer ដែលជាអតីតខ្សែបម្រើរបស់ក្លិបហង្សក្រហម Liverpool ថា Trent Alexander-Arnold នៅតែជាខ្សែការពារដ៏ល្អផ្ដាច់គេនៅក្របខណ្ឌ Premier League បើទោះបីជារូបគេកំពុងប្រឈមមុខនឹងការរិះគន់មិនសំចៃមាត់ពីសំណាក់អ្នកគាំទ្របាល់ទាត់អង់គ្លេសក៏ដោយ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
Trent ជាកីឡាករដែលចេញពីថ្នាលយុវជនរបស់ Liverpool និងបានស្នាក់នៅជាមួយក្រុម តាំងពីឆ្នាំ២០០៤មកម៉្លេះហើយដោយសារមើលឃើញសមត្ថភាពដ៏លេចធ្លោរបស់គេ លោកគ្រូ Jurgen Klopp ក៏បានយកគេមកចូលរួមជាមួយក្រុមឈុតធំកាលពីឆ្នាំ២០១៦ ដោយយកទុកមកជំនួសខ្សែការពារ Nathaniel Clyne ម្ដងម្កាល។
Trent បន្តធ្វើបានល្អជារឿយៗរហូតដល់ទទួលបានពាន Golden Boy នៅឆ្នាំ២០១៨ ដែលជាឆ្នាំតែមួយដែលក្រុមហង្សក្រហម Liverpool ក្លាយជាម្ចាស់ជើងឯកពានធំ Champions League នោះឯង។ក្រោយមកក៏កីឡាករវ័យ២២ឆ្នាំរូបនេះបានឈ្នះពាន Men's PFA Young Player of The Year(កីឡាករវ័យក្មេងដែលលេងល្អជាងគេប្រចាំឆ្នាំរបស់ PFA)នៅរដូវកាល ២០១៩-២០២០ទៀតផង។
ប៉ុន្តែខ្សែការពារសញ្ជាតិអង់គ្លេសរូបនេះបែរជាបង្កកំហុសមួយដ៏ធ្ងន់ក្នុងការប្រកួតទល់នឹង Southampton ដែល Liverpool ចាញ់ក្រុមម្ចាស់ផ្ទះ ១ ទល់នឹង ០ ដោយ Trent Alexander-Arnold បានធ្វើឲ្យបាល់ខូចដល់ទៅ៣៨ដងដែលជាចំនួនច្រើនបំផុតដែលគ្មានកីឡាករនៅ Premier League ណាធ្វើបានដូចគេឡើយ។
លោកគ្រូ Klopp ធ្លាប់បានចេញមុខការពារកូនក្រុមម្នាក់នេះដោយថា Trent ធ្លាក់ទម្រង់លេងដោយសាររូបគេបានឆ្លងវីរុសកូវីដ១៩កាលពីដើមរដូវកាលដែលធ្វើឲ្យសុខភាពរបស់គេរាងចុះខ្សោយជាងមុនហើយ លោក McAteer ក៏គិតដែរថា Trent មើលទៅដូចជាមនុស្សធ្វើការធ្ងន់និងមានទឹកមុខហត់នឿយជាប្រចាំ។
ប៉ុន្តែយ៉ាងណាមិញលោកនៅតែលើកសរសើរថា Alexander-Arnold ជាខ្សែការពារដ៏ល្អបំផុតនៅអង់គ្លេសដោយបានប្រាប់ FreesuperTips ថា៖
Trent Alexander-Arnold នៅតែជាខ្សែការពារស្លាបស្តាំដ៏ល្អបំផុតនៅអង់គ្លេសបើទោះបីជាគេកំពុងប្រឈមនឹងភាពលំបាកលំបិនក៏ដោយ។ គេអាចនឹងធ្លាក់ទម្រង់លេងនៅការប្រកួតពីរបីនេះ ប៉ុន្តែអ្នកសាកគិតទៅមើល៍ បើសិនអ្នកជាកីឡាករ Liverpool ដែលល្បីល្បាញមួយរូប គ្រប់គ្នាមុខជាតាមមើលតាមចាប់កំហុសហើយទោះបីអ្នកធ្លាក់ទម្រង់លេងបន្តិចក៏ដោយ។ វាដូចជាករណី Mohamed Salah កាលពីគេលេងនៅរដូវកាលដំបូងជាមួយ Liverpool អ៊ីចឹង កាលណោះ គេលេងបានល្អណាស់និងរកគ្រាប់បាល់បានច្រើន ស្រាប់តែនៅរដូវកាលបន្ទាប់ គេលេងមិនសូវបានល្អ គ្រប់គ្នាបែរជាថាគេអស់អនាគតហើយ។ កីឡាករដែលប្រឡូកក្នុងអាជីពជាកីឡាករបាល់ទាត់យូរឆ្នាំអាចទប់ទល់នឹងពាក្យរិះគន់ទាំងនោះបានប៉ុន្តែ Trent នៅក្មេងណាស់ គេត្រូវចូលលេងបាល់រាល់សប្តាហ៍ ទើបទទួលរងសំពាធផ្នែកផ្លូវចិត្តច្រើន។ ខ្ញុំថាគេមើលទៅដូចជាហត់នឿយណាស់ កម្លាំងរបស់គេចុះខ្សោយហើយផ្នែកផ្លូវចិត្តរបស់គេក៏មិនសូវនឹងនរដែរ។
លោកបានបន្តទៀតថា៖
ទោះបីជាយ៉ាងណាក៏ដោយក៏លោកគ្រូ Klopp គួរតែដាក់គេឲ្យចូលលេងក្នុងការប្រកួតទល់នឹង Manchester United ព្រោះវាជាការប្រកួតធំជាងគេក្នុងក្របខណ្ឌ Premier League រដូវកាលនេះ អ៊ីចឹងហើយពួកយើងត្រូវការកីឡាករដូចគេណាស់ បើសិនលោកគ្រូ Klopp ចង់ឲ្យគេសម្រាក គួរតែចាំរហូតដល់ការប្រកួត(ទល់នឹង Manchester United) នេះកន្លងផុត។
គួររម្លឹកផងដែរថា Liverpool នឹងត្រូវធ្វើដំណើរទៅជួប Manchester United នៅទឹកដីកីឡដ្ឋាន Old Trafford ថ្ងៃអាទិត្យទី១៧នេះហើយ៕
ប្រភព៖ goal
Bong I.T