អង់គ្លេស៖ យោងតាមរបាយការណ៍ ក្លិបមាន់ខ្នាយមាស Tottenham Hotspur អាចនឹងពិចារណាផ្ដាច់កុងត្រារបស់ខ្សែការពារ Danny Rose ខណៈដែលក្លិប West Brom កំពុងសម្លឹងចង់បានកីឡាករវ័យ៣០ឆ្នាំរូបនេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
Rose ត្រូវលោកគ្រូបង្វឹក Jose Mourinho មិនដាក់ឲ្យចូលលេងនោះឡើងនៅរដូវកាលនេះដោយគេគ្មានឈ្មោះក្នុងបញ្ជីកីឡាករលេងនៅ Premier League និងEuropa League ។
យោងតាម TalkSPORT បានប្រកាសថាក្លិបកំពុងចង់ឲ្យគេចាកចេញឆាប់ៗដោយផ្ដាច់កុងត្រារបស់គេត្រឹមនេះស្របពេល អ្នកជំនាញផ្នែកទាក់ទងផ្ទេរកីឡាករគឺលោក Alex Crook បាននិយាយថា៖
មានអ្នកប្រាប់ខ្ញុំថាគេ(Danny Rose)អាចនឹងមានភាគរយខ្ពស់ក្នុងការដើរតាមជំហានរបស់ Jack Wilshere គឺ Tottenham អាចនឹងលុបកុងត្រារបស់គេចោល។ពួកយើងទាំងអស់គ្នាសុទ្ធតែដឹងថាគេមិនមែនជាកីឡាករដែលស្ថិតក្នុងគម្រោងរបស់លោកគ្រូ Jose Mourinho ឡើយ។West Brom និង លោកគ្រូបង្វឹក Sam Allardyce ពិតជាចង់បានគេណាស់ប៉ុន្តែខ្ញុំមិនដឹងទេថាការផ្ទេរទៅទីនោះជារឿងល្អសម្រាប់អាជីពរបស់គេឬអត់។
Danny Rose បានមកចូលរួមជាមួយ Spurs ដោយផ្ទេរពីក្លិប Leeds តាំងពីឆ្នាំ២០០៧ ដោយធ្វើឲ្យគេក្លាយជាកីឡាករដែលលេងឲ្យ Spurs បានយូរបំផុតហើយពេលមកទឹកដីឡុងដ៍ដំបូង ក្លិបបានដាក់គេឲ្យក្លិប Watford, Peterborough, Bristol និង Sunderland ខ្ចីជើង។នាពាក់កណ្ដាលរដូវកាលមុន Rose បានទៅលេងនៅ New Castle ក្នុងលក្ខខណ្ឌខ្ចីជើងផងដែរ។
កីឡាករសញ្ជាតិអង់គ្លេសរូបនេះមានទំនាក់ទំនងមិនសូវល្អទេជាមួយលោកគ្រូបង្វឹក Mourinho ដោយយោងតាមភាពយន្តឯកសាររបស់ Spurs គឺគេថែមទាំងបានប្រកែកតវ៉ាថាលោកគ្រូទុកគេមិនស្មើកីឡាករដទៃ និងទាមទារឲ្យលោកគ្រូបកស្រាយ មិនត្រឹមតែប៉ុណ្ណោះ Rose ក៏បានហៅមិត្តរួមក្រុមរបស់គេថា "លាមក" ទៀតផង។
គួរបញ្ជាក់ផងដែរថាក្រៅពី West Brom ក្លិបពីរទៀតគឺ Norwich និង Brentford ក៏សម្លឹងចង់បានគេដែរស្របពេលកុងត្រារបស់គេនឹងមានសុពុលភាពរហូតដល់ខែមិថុនាឆ្នាំ២០២១ ឯណោះ៕
ប្រភព៖ thesun
Bong I.T