អង់គ្លេស៖ វិវាទពាក្យសម្ដីរវាងលោកគ្រូបង្វឹកសញ្ជាតិអាល្លឺម៉ង់ Jurgen Klopp របស់ក្រុមហង្សក្រហម Liverpool និងអតីតលោកអាជ្ញាកណ្ដាលឈ្មោះថា Mark Clattenburg បានផ្ទុះឡើងក្រោយលោកបានវាយបកតបទៅលោកគ្រូ Klopp រឿងដែលចោទថាអាជ្ញាកណ្ដាលតែងតែផ្ដល់បាល់ប៉េណាល់ទីទៅកាន់ក្រុមបិសាចក្រហម Manchester United ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ក្រោយចាញ់ក្រុម Southampton ក្នុងលទ្ធផល ១ ទល់នឹង ០ លោកគ្រូ Klopp បានចេញមុខតវ៉ាថាចង់ឲ្យអាជ្ញាកណ្ដាលផ្ដល់បាល់ប៉េណាល់ទីដល់ Liverpool ព្រោះកីឡាករខាង Southampton លេងកាចណាស់ និងថែមទាំងដៀមដាមទៀតថា Man UTD បែរជាទទួលបានបាល់ប៉េណាល់ទី២ឆ្នាំចុងក្រោយនេះក្នុងចំនួនច្រើនជាង Liverpool ក្នុងរយៈពេល៥ឆ្នាំកន្លះទៅទៀត។
តាំងពីលោកគ្រូបង្វឹក Ole Gunnar Solskjaer ឡើងមកកាន់តំណែងជំនួសលោកគ្រូបង្វឹក Jose Mourinho មក គឺ Man UTD ទទួលបានបាល់ប៉េណាល់ទីសរុប២៧ដង ខណៈដែល Liverpool បានតែ១៩ដងគត់។
ប៉ុន្តែលោកអតីតអាជ្ញាកណ្ដាលរបស់ក្របខណ្ឌ Premier League Mark Clattenburg ដែលបានចូលចុះសង្កេតដល់ទៅ២៩២ប្រកួតក្នុងអាជីពរបស់លោកបានចេញមុខនិយាយថាអាជ្ញាកណ្ដាលមិនបានចូលខាង Manchester United ឡើយនិងចោទថាលោកគ្រូKlopp និយាយនេះគឺចង់បង្អាក់សមាធិអាជ្ញាកណ្ដាលមុនជំនួប រវាងក្លិបយក្ស Man UTD និង Liverpool នៅថ្ងៃអាទិត្យនេះប៉ុណ្ណោះ។
លោក Clattenburg ព្រមទទួលស្គាល់ថានៅជំនាន់ Sir Alex Ferguson ដឹកនាំគឺ អាជ្ញាកណ្ដាលកាន់ជើង Man UTD ប៉ុន្តែពេលនេះវាមិនដូចមុនឡើយដោយបានបង្ហោះសារមួយក្នុង Mailonline ថា៖
អាជ្ញាកណ្ដាលទាំងលើទីលាននិងក្រៅទីលានគ្មានការស៊ីសំណូកណាមួយនោះឡើយ Klopp និយាយនេះគឺដើម្បីស៊កសៀតពួកយើងមែនទេ? ឬក៏គេចង់ដៀមដាមថាកីឡាករ Man UTD ធ្វើពុតជាដួល? បើសិនគោលបំណងរបស់គេគឺចង់និយាយពីជម្រើសអាទី១ខាងដើម ខ្ញុំគ្មានពេលឯណាបកស្រាយច្រើនទេ ព្រោះវាមិនពិត។ ប៉ុន្តែបើសិនគេនិយាយនេះដើម្បីបង្វែងដានថាកីឡាករ Man UTD ចូលចិត្តធ្វើពុតដើម្បីឲ្យបានបាល់ប៉េណាល់ទី អានេះខ្ញុំថាកីឡាករគេខ្លះក៏ទំនងជាធ្វើពុតដូចគ្នា។គេជាមនុស្សលាក់ពុតណាស់ដែលនិយាយដូចក្រុមខ្លួនឯងមិនធ្លាប់ធ្វើបែបហ្នឹង សូម្បី Mo Salah និង Mane ក៏មានជំនាញខាងធ្វើពុតដូចគ្នា។
លោក Clattenburg បានបន្តទៀតថា៖
កាលពីរដូវកាលមុនគេមិនធ្លាប់មួម៉ៅដូច្នេះទេព្រោះក្រុមគេឈ្នះសឹងតែរាល់សប្តាហ៍ គេមិនចូលចិត្តការបរាជ័យ គេនិយាយនេះគឺខុសណាស់ដែលថាអាជ្ញាកណ្ដាលចូលខាង Man UTD ។ ការពិតខ្ញុំព្រមទទួលស្គាល់ថាជំនាន់ Sir Alex Ferguson ដឹកនាំគឺវាដូច្នេះមែនតែពេលនេះវាមិនមែនអ៊ីចឹងទេ!
គួរបញ្ជាក់ផងដែរថា Liverpool ត្រូវ Manchester United រុញទម្លាក់មកលេខ២វិញដោយមាន៣៣ពិន្ទុក្នុងដៃ ចាញ់ភាគីលោកគ្រូ Sokskjaer ៣ ពិន្ទុ ខណៈក្រុមទាំងពីរនឹងប្រកួតតទល់គ្នានៅថ្ងៃអាទិត្យម៉ោង១១:៣០នាទីយប់នៅកម្ពុជា៕
ប្រភព៖ metro
Bong I.T