អេស្ប៉ាញ៖ លោកគ្រូបង្វឹក Zinedine Zindane ដែលដឹកនាំក្លិបអធិរាជស Real Madrid បានខឹងនឹងកូនក្រុមម្នាក់របស់ខ្លួនគឺ កីឡាករ Vinicius Jr. ក្រោយខ្សែប្រយុទ្ធរូបនេះមិនត្រងត្រាប់ស្ដាប់លោកគ្រូនិយាយកំឡុងពេលប្រជុំជាមួយក្រុម។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សកីឡាករវ័យ២០ឆ្នាំរូបនេះត្រូវលោកគ្រូ Zidane លែងសូវដាក់ឲ្យចូលលេងដោយសារមូលហេតុខ្លះៗដែលមួយក្នុងនោះគឺរូបគេបានបង្ហាញកាយវិការមិនសមរម្យនិងច្រងេងច្រងាង។
នៅក្នុងការប្រកួតរបស់ Real Madrid ទាំង៥ចុងក្រោយនេះគឺ Vinicius Jr. មិនបានចូលលេងទេ ដោយចំណាយពេលអង្គុយនៅកៅអីបម្រុងស្របពេលក្លិបកាំភ្លើងធំ Arsenal ត្រូវបានគេរាយការណ៍ថាកំពុងដេញតាមយកខ្សែប្រយុទ្ធសញ្ជាតិប្រេស៊ីលរូបនេះផងដែរ។
យោងតាមប្រភពព័ត៌មានពី AS រឿងហេតុនេះបានកើតឡើងមុនការប្រកួតនៅក្របខណ្ឌ Champions League វគ្គ១៦ក្រុមចុងក្រោយ ដែល Real Madrid ត្រូវប៉ះជាមួយ Manchester City នៅជើងទី២ កាលពីថ្ងៃ៧ខែសីហាមកម៉្លេះ ដោយ Vinicius បានបង្ហាញកាយវិការខឹងសម្បារមួម៉ៅដាក់ក្រុមពេលដឹងថាលោកគ្រូជ្រើសរើសយកខ្សែប្រយុទ្ធ Eden Hazard ឲ្យជាប់ជម្រើស១១នាក់ដំបូងហើយពេលលោកគ្រូប្រជុំក្រុមមុនការប្រកួត កីឡាករវ័យក្មេងម្នាក់នេះមិនព្រមស្ដាប់ទេដោយគិតតែចុចទូរស័ព្ទធ្វើឲ្យលោកគ្រូខឹងណាស់ តែមិននិយាយអីទេ។
បន្ទាប់ពីហេតុការណ៍នោះមក Vinicius ត្រូវលោកគ្រូ Zidane លែងទុកចិត្តនិងមិនសូវដាក់ឲ្យចូលប្រកួតទេ៕
ប្រភព៖ thesun