លោកស្រី ជីល បៃដិន គ្រោងនឹងចំណាយលុយ ១.២លានដុល្លារ ក្នុងការកែច្នៃបន្ទប់ទឹកថ្មីនៅសេតវិមាន

វ៉ាស៊ីនតោន៖ យោងតាមឯកសារសហព័ន្ធបានឱ្យដឹងថា លោកស្រី ជីល បៃដិន ដែលជាភរិយារបស់ប្រធានាធិបតីអាមេរិកជាប់ឆ្នោតលោក ចូ បៃដិន គ្រោងនឹងចំណាយទឹកប្រាក់ចំនួន ១.២ លានដុល្លារ ដើម្បីរចនាកែច្នៃបន្ទប់ទឹកថ្មីនៅសេតវិមាន ដោយវាជាចំណែកមួយនៃតួនាទីរបស់លោកស្រីនាពេលខាងមុខក្នុងនាមជា ស្រ្តីទី១ របស់សហរដ្ឋអាមេរិក។

បន្ថែមពីនេះ លោកស្រីនឹងចំណាយប្រាក់ចំនួនជាង ១២ ម៉ឺនដុល្លារ សម្រាប់សម្អាតសេតវិមានមុនការចូលកាន់តំណែងរបស់លោក ចូ បៃដិន និងជាង ៤ម៉ឺនដុល្លារ សម្រាប់ចំណាយលើសេវាកម្មសម្អាតកម្រាលព្រំផងដែរ។

គួរជម្រាបដែរថា លោកស្រី ជីល បៃដិន នឹងត្រួតពិនិត្យលើការកែទម្រង់ជាថ្មីនៅអាគារខាងកើតនៃសេតវិមាន (East Wing) ដែលវាជាផ្នែកមួយនៃសេតវិមានគ្រប់គ្រងដោយ ស្រ្តីទី១ របស់សហរដ្ឋអាមេរិក និងជំនួយការរបស់លោកស្រី។ ក្រោមការគ្រប់គ្រងរបស់លោកស្រី សេតវិមាននឹងកំណត់ការងារថ្មីៗជាច្រើនបន្ថែមទៀត៕