តូក្យូ៖ ក្រសួងសុខាភិបាលជប៉ុនកាលពីថ្ងៃអាទិត្យកន្លងទៅ បានប្រកាសរកឃើញនូវវីរុសកូរីដ១៩វ៉ារ្យង់ថ្មីមួយប្រភេទបន្ថែមទៀត លើអ្នកដំណើរចំនួន ៤នាក់ ដែលធ្វើដំណើរមកពីប្រទេសប្រេស៊ីល ដោយវីរុសនេះមានភាពខុសគ្នាទៅនឹងវីរុសដែលគេរកឃើញនៅចក្រភពអង់គ្លេស និងអាហ្វ្រិកខាងត្បូង។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សក្នុងនោះ ក្រសួងបានប្រាប់ឱ្យដឹងថា ពួកគេបានរកឃើញកូវីដ១៩វ៉ារ្យង់ថ្មីនៅលើបុរសម្នាក់អាយុ ៤០ឆ្នាំ, ស្រ្តីម្នាក់អាយុ ៣០ឆ្នាំ និងក្មេងជំទង់ ២នាក់។ អ្នកដំណើរទាំងនោះបានបញ្ចេញអាការៈដូចជា ពិបាកដកដង្ហើម, ឈឺក្បាល និងឡើងកម្ដៅ ទើបក្រសួងបញ្ចូនពួកគេទៅកាន់មន្ទីរពេទ្យ។
គួរបញ្ជាក់ដែរថា បច្ចុប្បន្ននេះ ប្រទេសជប៉ុនកំពុងមមាញឹកធ្វើការសិក្សា ដើម្បីធ្វើការវិភាគ និងតេស្តទៅលើប្រសិទ្ធភាពនៃវ៉ាក់សាំងចំពោះវីរុសវ៉ារ្យង់ថ្មីនេះ។ ហើយគេនៅមិនទាន់មានភ័ស្តុតាងបង្ហាញថា កូវីដ១៩វ៉ារ្យង់ថ្មី ដែលរកឃើញក្នុងអ្នកដំណើរមកពីប្រទេសប្រេស៊ីល មានសមត្ថភាពចម្លងលឿន ឬយ៉ាងណានោះទេ៕